Túrkııada maska taqpaı júrýge ruqsat berildi
Túrkııanyń Densaýlyq saqtaý mınıstri Fahrettın Koja koronavırýstyń taralýymen kúres jónindegi ǵylymı keńes otyrysynyń qorytyndysy boıynsha ótken brıfıngte elde ashyq aýada jáne jaqsy jeldetiletin jerlerde maska kııýdi mindetteý alynatynyn aıtty.
«Bizge endi kóshede maska taǵýdyń qajeti joq. Biraq bul medıtsınalyq atrıbýt kúndelikti ómirimizden ketpeıdi. Tıisti qashyqtyq saqtalmaǵan jabyq ǵımarattarda áli de qorǵanys quraldaryn paıdalanýymyz kerek. Tar keńistik, ushaq pen kólik kabınalary, kórermen zaldary, medıtsına mekemeleri men oqý oryndarynda áli de maska taǵýǵa týra keledi. Sonymen qatar, qart adamdar men sozylmaly aýrýǵa shaldyqqan adamdarǵa qorǵanýǵa keńes beriledi», - dedi mınıstr.
Sonymen qatar, elde COVID-ke qarsy erejelerdiń basqa da jeńildetýleri bekitildi.
Endi el mektepterinde synyptarda vırýs juqtyrǵan oqýshydan kem bolsa, synyp karantınge jabylmaıdy, al qalǵan balalar oqýyn oqshaýlanbaı jalǵastyra alady.
Adamdarda koronavırýs belgileri bolmasa, olardan PTR testileri alynbaıdy. COVID-19 juqtyrǵandarmen baılanysta bolǵan jáne aýrý belgileri joq adamdar endi qoǵamnan oqshaýlanbaıdy.
Sonymen qatar, Túrkııada kelesi aptadan bastap barlyq medıtsınalyq mekemelerde otandyq TURKOVAC vaktsınasy egiledi.
Mınıstrdiń aıtýynsha, Túrkııa epıdemııalyq protsestiń bastapqy kezeńinde barlyq qajetti sharalardy qabyldaǵan jáne sonyń nátıjesinde pandemııa qurbandarynyń barynsha az bolýyn qamtamasyz etken alǵashqy elderdiń biri boldy.
Túrkııa Densaýlyq saqtaý mınıstrliginiń málimetinshe, ótken táýlikte elde COVID-19-ǵa 407 536 synaq júrgizildi, onyń ishinde 56 780 adamnan vırýs anyqtaldy, 189 adam qaıtys boldy, dertten 68 268 adam jazyldy.
Elde adamdarǵa salynǵan vaktsınanyń jalpy sany 145 801 884 dozaǵa deıin ósti.