Túrkııada Qojanasyr aptalyǵy ótip jatyr - Sheteldegi qazaqsha BAQ-qa sholý
5-10 shilde aralyǵynda Qojanasyr aptalyǵy ótip jatyr - TRT
Qojanasyrdyń aty atalǵan ázil áńgimeler dúnıe júziniń kóptegen jerinde aıtylady. Búgin elimizdiń eń ataqty ázilderiniń keıipkeri Qojanasyrdy eske alamyz. Qojanasyr Túrkııanyń Ortalyq Anadoly aımaǵyndaǵy Konııa provıntsııasynyń Akshehır qalasynda týdy dep esepteledi, dep habarlaıdy Túrkııa radıo teledıdar agenttigi .
Túrkııa aqparat quralynyń keltirgen deregine súıensek, Qojanasyr Osmanly padıshasy Iyldyrym Bııazıt kezinde ómir súrdi dep qabyldanady.
Ázil patshasy sanalǵan Qojakeń - sózge tapqyrlyǵymen, aqylymen kópti tań qaldyryp, adamdardy bir jaǵynan kúldirse, bir jaǵynan oılandyrǵan tarıhı tulǵa.
«Qojanasyrdyń aty atalǵan ázil áńgimeler dúnıe júziniń kóptegen jerinde aıtylady. Ol áli de adamdardy kúldire otyryp, oılanýǵa shaqyrady», dep jazady TRT agenttigi.
Ózbekstan men Qazaqstan prezıdentteri telefon arqyly sóılesti - ÓzA
4 shildede Ózbekstan respýblıkasynyń prezıdenti Shavkat Mırzııaev pen Qazaqstan respýblıkasynyń prezıdenti Qasym-Jomart Toqaev telefon arqyly sóılesti. Áńgime barysynda taraptar Ózbekstan men Qazaqstan arasyndaǵy strategııalyq seriktestik pen odaqtastyq qatynastardy odan ári nyǵaıtýdyń ózekti máselelerin talqylady, dep habarlaıdy ÓzA aqparat agenttigi.
Ózbekstan memlekettik aqparat agenttiginiń dereginshe, eki el prezıdentteri Qazaqstan men Ózbekstan arasyndaǵy joǵary deńgeıde qol jetkizilgen ýaǵdalastyqtardy júzege asyrýǵa, sonyń ishinde ónerkásip, aýyl sharýashylyǵy, kólik, logıstıka, ónimdi ózara jetkizý salalaryndaǵy yntymaqtastyq jobalaryn ilgeriletýge erekshe nazar aýdarǵan.
Sondaı-aq taraptar áńgime barysynda Ortalyq Azııa memleketteri basshylarynyń kezekti Konsýltatıvtik kezdesýine daıyndyq aıasyndaǵy kópjaqty jáne óńirlik yntymaqtastyq máseleleri boıynsha pikir almasty.
«Budan bólek, ótken aptadaǵy Bishkekte ótken Qambar Ata GES-1 qurylysy jobasy boıynsha Ózbekstan, Qazaqstan jáne Qyrǵyzstan úkimettik delegatsııalarynyń úshjaqty kelissózderiniń nátıjeleri de atap ótildi», dep jazady «ÓzA».
Jyl basynan beri 7 myńnan astam qazaq Qazaqstanǵa oraldy - Parstoday
Bıylǵy jyldyń basynan beri Ózbekstan, Qytaı, Túrikmenstan jáne Mońǵolııa sııaqty ártúrli elderde turatyn 7 myń 500-ge jýyq etnıkalyq qazaqtar óz atamekeni Qazaqstanǵa oraldy.
Bul týraly osy aptada Irannyń Parstoday aqparat agenttigi habarlaǵan bolatyn.
Parstoday aqparat agenttiginiń keltirgen deregine súıensek, Qazaqstan Eńbek jáne halyqty áleýmettik qorǵaý mınıstrliginiń baspasóz ortalyǵy seısenbi kúni bıylǵy 7500 adamdy qosqanda 1991 jyldan beri otanyna oralǵan qazaqtardyń jalpy sany 1 095 000 adamǵa jetkenin habarlady.
«Eńbek jasyndaǵy qazaq ımmıgranttarynyń sany – 62 paıyz, eńbekke jaramdy jastan tómen – 1,24 paıyz jáne zeınetkerler – 13,9 paıyzdy qurap otyr» dep jazady ırandyq aqparat quraly.
Qojaǵa qoıylǵan eskertkish týraly 10 derek - Kaznews
Maýsym aıynyń alǵashqy kúni Qazaqstannyń Nur-Sultan qalasynda «Meniń atym Qoja» fılminiń basty keıipkerine eskertkish qoıylǵan. Qojaǵa qoıylǵan osy eskertkish týraly 10 derek usynamyz, dep jazady mońǵolııalyq Kaznews aqparat agenttigi.
Atalǵan aqparat agenttigi, Qojaǵa arnalǵan eskertkish «Balalar jyly» aıasynda 1 maýsym kúni ashylǵanyn jazady. Sonymen qatar, maqalada «Meniń atym Qoja» – 1957 jyly jazylǵan, qazaq balalar ádebıetiniń ozyq týyndylarynyń biri ekenin, sondaı-aq atalǵan týyndynyń avtory – balalar ádebıetiniń klassıgi Berdibek Soqpaqbaev ekenin atap ótedi.
«Meniń atym Qoja» fılmniń basty keıipkeri Qojaǵa qoıylǵan músinniń bıiktigi – 183 sm. Ideıa avtory Murat Qojamqulovtyń bastamasymen eskertkish qoıý máselesin belgili jýrnalıst Janbolat Aýpbaev ta kótergen.
Basylym «Meniń atym Qoja» fılmniń basty keıipkeriniń músini týraly 10 derekti usynǵan.
Aıta keteıik, músinshi Talaphan Azamat bul ıdeıany júzege asyrý úshin úsh aıǵa jýyq ýaqyt jumsaǵan. Eskertkish Nur-Sultan qalasynyń «Jetisý» saıabaǵynda ornalasqan.
Áıgili aqyn Jamalqan Qarabatyrqyzy ómirden ozdy – Halyq gazeti
Bundaı aqparatty osy aptada Qytaıdyń «Halyq gazeti» aqparattyq portaly da habarlady.
Qytaıdaǵy qazaq aıtys óneriniń órkendeýine ólsheýsiz úles qosqan, aıtystyń memlekettik dárejedegi ónerpazy, áıgili aqyn, qalamger Jamalqan Qarabatyrqyzy 2022 jyly 2 shilde kúni 81 jasynda dúnıeden ótti, dep habarlaıdy «Halyq gazeti».
Aıta keteıik, Jamalqan Qarabatyrqyzy 1940 jyly 29 qarashada Qytaı Halyq Respýblıkasyndaǵy Shyńjańnyń Tarbaǵataı aımaǵyndaǵy Jáıir taýynda qarapaıym otbasynda dúnıege kelgen.
10 jasynan óleń-jyrǵa áýestenip, alymdy, zerek bolyp ósken Jamalqan Qarabatyrqyzy dombyramen alqaly jıyndarda án aıtyp, qara óleń básekesine túsip, aıtysqa qatysa bastaıdy. Jazba óleńge de den qoıyp, tyrnaqaldy shyǵarmalary jastaıynan gazet-jýrnal betterine jarııalanǵan.
Qytaılyq aqparat quraldarynyń keltirgen deregine súıensek, Jamalqan Qarabatyrqyzy aıtys ónerinde 18 márte 1 dárejeli, 6 márte 2 dárejeli júldeni jeńip alǵan eken, budan bólek ol 2 márte halyqaralyq syılyqtardy qanjyǵasyna baılaǵan.
Sońǵy jyldary halyq aýyz ádebıetiniń ereksheligi men túrlerin zertteýge myqtap kirisken ol, «Aıtys jáne meniń áriptesterim», «Aýyz ádebıetindegi áıelderdiń orny», «Kórkemdik pen sheshendik», «Aıtystyń sıpaty», «Besik jyrynyń ereksheligi» sııaqty arnaıy eńbekterin jarııalady.
Jamalqan Qarabatyrqyzy Qytaıdaǵy aqyndar aıtysyn uıymdastyrý sharalaryna talaı márte belsene qatysty. Sonymen qatar, ol joǵary oqý oryndarynda ashylǵan arnaıy aqyndar synyptary men qysqa merzimdi aqyndar kýrstaryna aqyndyq sheberlikten dáris bergen. Sońǵy jyldary aqynnyń kóptegen eńbekteri men jazbasha muralary memlekettik til qytaı tiline aýdarylǵan.
«Aqyn apamyz aramyzdan ozǵanymen, onyń el mádenıetine qosqan úlesi halyqtyń júreginde máńgi saqtalady», dep túıindeıdi Qytaıdyń «Halyq gazeti» aqparat portaly.