Túrkııada koronavırýsqa qatysty shekteýler jeńildetildi

ANKARA. Anadoly-QazAqparat – Túrkııa bıligi 1 shildeden bastap epıdemıologııalyq jaǵdaıdyń jaqsarýyna baılanysty koronavırýspen kúreske qatysty sharalar taǵy da jeńildetiletinin jarııalady, dep habarlaıdy QazAqparat Anadoly agenttigine silteme jasap.

Eldiń Іshki ister mınıstrligi taratqan nusqaýlyqqa sáıkes aldaǵy beısenbiden bastap komendant saǵaty toqtatylyp, qalaralyq qatynas shekteýleri alynyp tastalady.

Sonymen qatar, atalǵan merzimde barlyq jumys oryndary ashylyp, pandemııaǵa baılanysty qyzmetin toqtatqan kınoteatrlar qaıta jumys isteı bastaıdy. Kafe men meıramhanalar kelýshi sanyn shektemeı ǵımarat ishinde jáne dalada qyzmet kórsete bastaıdy.

Sonymen birge 1 shildede úılený toıy ashyq jerde qonaq sanyn shektemesten ótkiziledi. Kontsert jáne festıval ótkizýge buǵan deıin belgilengen saqtyq sharalary buzylmasa ruqsat beriledi. Saıabaq, daladaǵy serýen oryndary men kempıngter de ashyq bolady.

Bangladesh, Brazılııa, OAR, Úndistan, Nepal, Shrı-Lankadan kelgenderdi mindetti karantınge alý da toqtatylady.

Túrkııaǵa Aýǵanstan men Pákistannan kelgen ne sol elderde sońǵy 14 kúnde bolǵandardy 14 kúnge karantınge alý merzimi 10 kúnge deıin qysqartylady.