Túrkııada qıraǵan turǵyn úılerge baılanysty ustalǵandar sany 269-ǵa jetti

ASTANA. ANADOLY – QazAqparat – Túrkııanyń Kahramanmarash provıntsııasynda bolǵan aqpandaǵy zilzaladan qıraǵan ǵımarattarǵa qatysty ustalǵandar sany 269-ǵa jetti, dep habarlaıdy QazAqparat Anadoly agenttigine silteme jasap.

Zilzalanyń aýqymdy zardabyna baılanysty tergeý jumysy jalǵasyp jatyr.

Bas prokýratýra adam ólimine ákelgen sapasyz qurylysqa 1068 adamnyń qatysy bar ekenin anyqtady. 320 kúdikti elden shyqpaý týraly qolhatpen bosatyldy.

Sondaı-aq 228 kúdiktini ustaý týraly buıryq berilse, 106 kúdiktini qamaýǵa alýǵa order berildi.

Kúdiktilerdiń 43-i ómirden ótkeni, 14 adam shetelde ekeni anyqtaldy.

Buǵan deıin Túrkııada zilzaladan qıraǵan turǵyn úıler isine qatysy bar degen 247 adam tutqyndalǵany habarlanǵan bolatyn.

6 aqpanda Túrkııada epıtsentri Kahramanmarashta bolǵan, magnıtýdasy 7 baldan asatyn eki zilzala tirkeldi. Júzdegen avtershokqa ulasqan jerasty dúmpýi eldiń 10 provıntsııasy men kórshiles elderde, onyń ishinde Sırııada sezilgen. Keıingi derekter boıynsha, joıqyn zilzala saldarynan qaza tapqandar sany 46 104 adamǵa jetti.

Úıindilerdiń astynan izdeý jumystaryna 88 eldiń 11 myń qutqarýshysy qatysty, onyń qatarynda qazaqstandyqtar da bar. Túrkııaǵa zilzaladan kelgen shyǵyn $100 mlrd asýy múmkin. Bul týraly Túrkııadaǵy BUU Damý baǵdarlamalarynyń ókili Lýıza Vınton habarlady.

Mamandardyń aıtýynsha, óńirde áli jarty jyl boıy aftershoktar qaıtalanady. Túrkııadaǵy joıqyn zilzalany boljaǵan nıderlandylyq zertteýshi Frank Hýgerbıts naýryzdyń basynda jańa apattardyń bolýy múmkin ekenin eskertti.

7 naýryzda Hataı, Kahramanmarash jáne Kaıserı provıntsııalarynda úsh jer silkinisi tirkeldi.