Túrkııada qazaqtyń tulǵalaryn nasıhattaǵandar QR Prezıdentiniń alǵys hatymen marapattaldy
Іs-sharada Abaıdyń 175 jáne Ál- Farabıdiń 1150 jyldyǵyna arnalǵan sharalar qorytyndylanyp, Túrkııada mereıtoıǵa atsalysqan saıasatkerler, qoǵamdyq qaıratkerler men kórnekti ókilder marapattaldy. Olarǵa Qazaqstan Prezıdenti Qasym-Jomart Toqaevtyń alǵys haty tabystaldy.
Halyqaralyq Túrki akademııasy, Qazaqstan elshiligi men Eýrazııa jazýshylar odaǵynyń uıytqysymen ótken sharada Myrzataı Joldasbekovtiń «Dala ádebıetiniń uly aqyny Jambyl» kitabynyń túrik tiline aýdarylǵan nusqasynyń tusaýkeseri ótti. Túrik oqyrmanyna jol tartqan týyndy, dúldúl aqynnyń 175 jyldyǵyna tartý.
Alǵys hatqa ıe bolǵandar baýyrlas elder arasyndaǵy yntymaqtyń nyǵaıýyna qyzmet etetinin aıtty.
«Qazaq jurtyna jáne Qazaqstan prezıdentine usynǵan marapaty úshin alǵys aıtamyn. Túrkııa parlamentinde Qazaq eliniń dosy ári bir baýyry otyr dep esepteńiz. Bul shyn nıetten aıtqan sózim. Biz qazir eki el shyǵarmyz, biraq – túbi bir ultpyz. Túrkııada Abaıdy tanystyrý jumystary júrip, túrik halqy qazaq aqynyn jaqyn tanydy. Degenmen, Abaıtaný óz jalǵasyn tabýy tıis. Bıyl – Táýelsizdiktiń otyz jyldyq mereıtoıy. Demek bizder atqaratyn sharýa aýqymdy. Óz basym baýyrlardyń yntymaǵy arta túsýi úshin qyzmet etýden jalyqpaımyn», - dedi Parlament depýtaty Metın Gúndoǵdu.
«20 jyldan beri Qazaqstanǵa qatysty barlyq dúnıelerdi úzbeı oqyp júrmin. Turan jeri – bizdiń atajurtymyz. Qazaq tarıhy – bizdiń de tarıhymyzdyń bir bólshegi. Árıne muny salmaqty sharalarda túsindirý qajet. Elimizdiń túkpir-túkpirin aralap, túsindirý jumystaryna atsalystym. Abaı jáne Ál-Farabı murasyń tek qazaqtyń ǵana emes, kúlli túrki áleminiń ortaq baılyǵy jáne sol murany nasıhattaý jolynda eńbek etemiz», - dedi saıasattanýshy, ǵalym Kúrshat Zorlý.