Túrkııada Qazaqstan Prezıdentiniń kezekten tys saılaýyna daýys berý aıaqtaldy
Túrkııadaǵy Qazaqstannyń dıplomatııalyq ókildikterinde jergilikti ýaqytpen tańǵy saǵat 7:00-den bastap №286, 255 jáne 296 saılaý ýchaskeleri jumys istep, týra saǵat 20:00-de daýys berý toqtatyldy.
Túrkııada kúni boıy qazaq azamattarynyń joǵary belsendiligi baıqaldy. Saılaý ýaqyty aıaqtalmaı jatyp saılaýshylar azamattyq quqyqtary aıasynda tańdaý jasaý úshin saılaý ýchaskelerine keldi. Túrik jerinde azamattyq ustanymyn kórsetken qazaqstandyqtardyń basym bóligi stýdentter, týrıster, kásipkerler, sondaı-aq dıplomatııalyq mıssııalar men halyqaralyq uıymdardyń ókilderi boldy.
Túrkııada ashylǵan úsh saılaý ýchaskesinde de saılaýshylarǵa barlyq jaǵdaı jasalǵan. Shalǵaı óńirlerden kelgen stýdentter kólikpen qamtamasyz etildi. Sonymen qatar, densaýlyǵyna baılanysty saılaý ýchaskelerine bara almaǵan qazaqstandyqtar úshin jyljymaly jáshikter uıymdastyryldy.
Qazaqstannyń Túrkııadaǵy elshiliginiń málimetinshe, daýys berýge tirkelgen azamattardyń jalpy sany 1000-nan asady.
Ankaradaǵy saılaý ýchaskesinde kóp adam daýys bergeni, boljam boıynsha jalpy saılaýshylardyń qatysýy shamamen 100 paıyzdy quraǵany atap ótildi. Qazaqstan azamattary jaqsy belsendilik tanytty.
Ankara, Ystambul jáne Antalııadaǵy saılaý ýchaskeleri jabyldy. Osy ýaqytta komıssııa músheleri daýystardy sanap jatyr.
Túrkııadaǵy túrli halyqaralyq uıymdar ókilderinen jasaqtalǵan táýelsiz baqylaýshylardyń sózinshe, daýys berý barysynda zań buzýshylyqtar anyqtalmaǵan. Saılaý quqyqtary men barlyq daýys berý protsedýralary saqtaldy.