Túrkııada iz-túzsiz joǵalǵan qazaqstandyqtar týraly aqparat túsken joq - Smadııarov

ASTANA. QazAqparat – Túrkııadaǵy jer silkinisinen keıin iz-túzsiz joǵalǵan Qazaqstan azamattary týraly aqparat joq. Bul týraly Syrtqy ister mınıstrliginiń resmı ókili Aıbek Smadııarov málim etti, dep habarlaıdy QazAqparat tilshisi.

«2023 jylǵy 8 aqpanda Hataı ólkesiniń Antakıa qalasynda izdeý jumystarynyń nátıjesinde Túrkııa qutqarýshylary Qazaqstan azamaty Sabına Mamadıarovany qıraǵan úıden taýyp, shuǵyl túrde Adana qalasyndaǵy «Ceyhan» aýrýhanasyna jetkizdi. Ózderińiz biletindeı, onyń zaqymdalǵan qolyna operatsııa jasaldy. Antalııadaǵy bas konsýlymyz oǵan jeke baryp qaıtty, dárigerimen sóılesti. Qazir ol áli de dárigerlerdiń baqylaýynda, janynda týystary bar», - dedi resmı ókil vedomstvoda ótken aptalyq brıfıng barysynda.

Sonymen qatar ol Túrkııadaǵy jer silkinisi kezinde qaza tapqan otandastarymyzdyń týystaryna máıitterdi otanyna jetkizýge kómek kórsetilgenin atap ótti.

«Búgingi tańda Túrkııada jer silkinisi saldarynan joǵalǵan QR azamattary týraly qosymsha aqparat kelip túsken joq. Degenmen, dıplomattarymyz jergilikti bılikpen baılanysta jáne qaza tapqandar men zardap shekkenderdiń tizimderin muqııat tekserip keledi», - dedi Aıbek Smadııarov.