Túrkııada ǵaryshqa ushatyn alǵashqy adam áıel bolýy múmkin

NUR-SULTAN. Anadoly-QazAqparat – Túrkııanyń ǵarysh agenttigi eldi tehnologııalyq damýdyń jańa deńgeıine shyǵaratyn, ǵarysh ekonomıkasy salasynda jańa múmkindikter ashatyn baǵdarlamany ázirledi. Bul týraly búgin Anadoly agenttigi redaktorlarynyń dóńgelek ústeli barysynda Túrkııanyń ónerkásip jáne tehnologııalar mınıstri Mustafa Varank málim etti, dep habarlaıdy QazAqparat Anadoly agenttigine silteme jasap.

Vedomstvo basshysynyń aıtýynsha, ǵarysh baǵdarlamasyn iske asyrý jekelegen eldiń adamı kapıtaly men qarjy múmkindikterine ǵana baılanysty emes.

Munda kóptegen máseleniń sheshimin jeńildete alatyn saıası qoldaý mańyzdy, dep atap ótti Varank.

«Ulttyq ǵarysh baǵdarlamasy Túrkııany maksımaldy qosylǵan quny bar ónimdi shyǵaratyn kóshbasshylar qataryna shyǵarady. Bul baǵdarlama – búkil eldiń namysy», - dedi mınıstr.

Mınıstrlik basshysy Túrkııanyń ǵaryshtaǵy birinshi azamaty áıel adam bolýyn el prezıdenti Rejep Taıyp Erdoǵannyń ózi qalaıtynyn atap ótti.

Biz orbıtaǵa bul mıssııa úshin eldiń eń laıyqty turǵynyn jiberemiz, dep atap ótti ol.

Varank túrik ınjenerleri jasaǵan tehnologııalardyń ǵaryshtyń zerttelýine úles qosatynyn atap ótti.

Ol Túrkııanyń ǵarysh ekonomıkasy salasynda mańyzdy oıynshy bolatynyna senim bildirdi.

Sondaı-aq mınıstr Túrkııanyń ǵarysh salasynda úsh elmen yntymaqtastyq týraly kelisimge qol qoıǵanyn habarlady.

Budan bólek, Pákistan jáne Ázerbaıjan elderimen kelisim ázirlenip, kóp uzamaı olarǵa da qol qoıylady.