Túrkııada búgin ekinshi ret jer silkindi

ANKARA. Anadoly – QazAqparat – Túrkııada taǵy da 4,9 baldyq jer silkinisi tirkeldi, dep habarlaıdy QazAqparat Anadoly agenttigine silteme jasap.

Jer silkinisiniń oshaǵy Qahramanmarash aımaǵynan soltústik-shyǵysqa qaraı 100 shaqyrym jerde bolǵan. Tereńdigi 5 km. Jer silkinisinen zardap shekkender týraly aqparat túsken joq.

Aıta ketsek, bul Túrkııanyń Qahramanmarash provıntsııasynda búgin bolǵan ekinshi jer silkinisi. Buǵan deıin atalǵan provıntsııada qýaty 4,7 magnıtýdasymen jer silkinisi tirkelgen edi.

Eske salaıyq, 6 aqpanda Túrkııanyń Kahramanmarash provıntsııasynda qýaty 7 baldan asatyn eki jer silkinisi boldy. Terbelis eldiń 10 provıntsııasynda, sondaı-aq kórshiles memleketterde, sonyń ishinde Sırııada sezildi.
Mamandar aımaqta jerasty dúmpýleri áli de jarty jyl boıy jalǵasady degen boljam jasady. Túrkııada joıqyn zilzala bolatynyn boljaǵan Nıderland zertteýshisi Frank Hýgerbıts naýryz aıynyń basynda jańa apattar kútiletinin eskertti.