Túrkııada alǵash ret «Qymyz Fest» festıvali ótti

ANKARA.QazAqparat – Túrkııa astanasy Ankara qalasynda alǵash ret qazaqtyń ulttyq sýsyny qymyzǵa arnalǵan is-shara ótti, dep habarlaıdy QazAqparattyń menshikti tilshisi.

Festıvaldi Túrkııadaǵy QR elshiliginiń qoldaýymen TıÝRKSOI Halyqaralyq túrki mádenıeti uıymy men Qazaqstannyń mádenıet jáne sport mınıstrligi birlesip uıymdastyrdy.

Іs-shara Kazak obası dep atalatyn aımaqta ótti. Sózbe-sóz aýdarǵanda ol qazaq kóshpelileriniń aıaldaıtyn nemese túneıtin orny degendi bildiredi.

Shaǵyn qazaq aýyly jaıylym jerlerge ornalasty. Ol jerge kıiz úı tigilip, qazanǵa arnalǵan oshaqtar qoıyldy.

Túrkııadaǵy mereke bıe saýyp, dástúrli sýsyndy daıyndaýmen este qaldy. Uıymdastyrýshylar adamdarǵa qymyzdyń paıdasyn túsindirip, attardy jaılaýǵa jaıý qupııalarymen bólisti. Al kilem toqýdyń ulttyq tehnıkasy baýyrlas túrik halqynda erekshe qyzyǵýshylyq týdyrdy.

Qazaq sýsyny festıvaline kóp adam keldi. Qonaqtardyń qatarynda jergilikti turǵyndar, saıasatkerler men Túrkııa óner qaıratkerleri boldy. Túrkııa joǵary oqý oryndarynda oqıtyn qazaqstandyq stýdentter dostaryna ulttyq taǵamdar, salt-dástúr týraly aıtyp jatty.

Qymyz merekesinde qonaqtarǵa dástúrli qazaq taǵamdary, onyń ishinde et pen palaý usynyldy. Ár kıiz úıde dastarhan jaıylyp, syıly qonaqqa «bas tartyldy».

Aýa raıynyń qubylyp turǵanyna jáne jaýyn-shashynǵa qaramastan festıval kelýshilerge jaqsy kóńil-kúı, kúsh-qýat pen pozıtıv syılady. Bári qymyz iship, palaý jep, ulttyq aspaptardyń súıemeldeýindegi zamanaýı qazaq ánderine bılep, jaqsy kóńil-kúımen qaıtty.