Túrkııada 28 mamyrda prezıdent saılaýynyń ekinshi kezeńi ótedi

ANKARA. Anadoly – QazAqparat – Túrkııada prezıdent saılaýynyń ekinshi kezeńi 28 mamyrda ótedi, dep habarlaıdy QazAqparat Anadolyǵa silteme jasap.

Bul týraly eldiń Ortalyq saılaý komıssııasynyń basshysy Ahmet Iener bıýlletenderdiń 100 paıyzy sanalǵannan keıin málim etti.

Onyń aıtýynsha, el ishinde daýys berýshilerdiń belsendiligi 88,92 paıyzdy qurady, shet elderde – 52,69 paıyz.

Eske salaıyq, jeksenbi, 14 mamyr kúni Túrkııada parlament jáne prezıdent saılaýy ótti.

Bıýlletenderdiń 99,38% sanalǵan kezde daýys berý nátıjesi kelesideı bolǵan edi: Rejep Taııp Erdoǵan - 49,42%, Respýblıkalyq halyq partııasynan kandıdat Kemal Kylychdaroglý - 44,95%, «Ata» saıası alıansynyń ókili Sınan Ogan - 5,20%.