Túrkııa Prezıdenti Rejep Taııp Erdoǵan Nursultan Nazarbaevty týǵan kúnimen quttyqtady

NUR-SULTAN. QazAqparat - Qazaqstannyń Tuńǵysh Prezıdenti Túrkııa Respýblıkasynyń Prezıdenti Rejep Taııp Erdoǵanmen telefon arqyly sóılesti, dep habarlaıdy Elbasynyń baspasóz qyzmeti.

Túrkııa Prezıdenti Elbasyn shyn júrekten týǵan kúnimen quttyqtap, myqty densaýlyq jáne baýyrlas Qazaqstannyń múddesi jolyndaǵy kópjyldyq memlekettik qyzmetine jańa jetistikter tiledi.

Rejep Taııp Erdoǵan Nursultan Nazarbaev óz eliniń kóshbasshysy ǵana emes, sonymen qatar Nur-Sultan men Ankara arasyndaǵy strategııalyq seriktestiktiń negizin qalaýshy retinde zor qurmetke ıe bolǵanyn aıtty.

Túrkııa Prezıdenti Qazaqstannyń Tuńǵysh Prezıdentiniń Túrkitildes memleketter yntymaqtastyǵy keńesiniń (Túrki keńesi) Qurmetti tóraǵasy retindegi aıryqsha róline toqtaldy, sondaı-aq Eýrazııa keńistigindegi ıntegratsııalyq bastamalarynyń mańyzdylyǵyn erekshe atap ótti.

Elbasy Rejep Taııp Erdoǵanǵa izgi tilekteri úshin rızashylyǵyn bildirip, Qazaqstan men Túrkııanyń qazirgi strategııalyq seriktestiginiń deńgeıine joǵary baǵa berdi.

Sońynda Nursultan Nazarbaev pen Rejep Taııp Erdoǵan aldaǵy kezdesýlerdiń kestesin talqylady.