Túrkııa prezıdenti Qazaqstan Tótenshe jaǵdaılar birinshi vıtse-mınıstrin marapattady
Marapatqa ıe bolǵan 80-nen astam eldiń ókilderi arasynda Qazaqstannan Tótenshe jaǵdaılar birinshi vıtse-mınıstri Ibragım Kúlshimbaev ta bar, ol zilzala saldaryn joıýǵa kómek kórsetkeni úshin medalimen nagradtaldy. Memlekettik nagradany Túrik Respýblıkasynyń Prezıdenti Rejep Taıyp Erdoǵan tabys etti.
«Baýyrlas Túrik halqyna taǵy da kóńil aıtamyn. Adamdardyń ómirin qutqarýǵa qatysqan barsha halyqqa, qutqarýshylar men dıplomatııalyq korpýsqa rızashylyǵymdy bildiremin! Biz Túrkııa halqy jaqyn arada tabıǵı apattyń saldaryn jeńedi dep senemiz!» - dep Ibragım Kúlshimbaev atap ótti.
Túrkııanyń úsh óńirinde izdestirý-qutqarý jumystaryn júrgizý bastalǵannan beri Qazaqstan TJM qutqarýshylarynyń kúshteri 7 adamdy qutqardy.
Qaza tapqan 88 adamnyń, onyń ishinde 10 balanyń denesi shyǵaryldy. Qazaqstandyq qutqarýshylar qolmen, sondaı-aq ınjenerlik tehnıkany, avarııalyq-qutqarý jabdyqtaryn, shants aspaptaryn tarta otyryp, 250 myń tekshe metrden astam úıindilerdi bólshektedi.
Aıta keteıik, Prezıdent Qasym-Jomart Toqaevtyń Jarlyǵymen Túrkııada izdestirý-qutqarý jumystaryn júrgizgen mamandar da memlekettik nagradalarmen marapattaldy.
6 aqpanda Túrkııanyń ońtústik-shyǵysynda jáne Sırııanyń soltústiginde joıqyn jer silkinisi boldy. Epıtsentri Túrkııanyń Kahramanmarash provıntsııasyndaǵy Pazardjık aýdanynda ornalasty. Atalǵan elde sońǵy málimet boıynsha, 46,1 myńnan astam adam qaza tapty, 26 myńnan astam ǵımarat qırady. Qulaǵan nysandarǵa qatysty is boıynsha 247 adam qamaýǵa alyndy.