Túrkııa prezıdenti: Eldiń ońtústik-shyǵysynda munaıdyń jańa qory anyqtaldy
08:42, 03 Mamyr 2023
ASTANA. QazAqparat – Túrkııa prezıdenti Rejep Taııp Erdoǵan eldiń ońtústik-shyǵysyndaǵy Shırnak provıntsııasynyń Djýdı jáne Gabar aýdandarynda munaıdyń jańa qory tabylǵanyn málimdedi, dep jazady QazAqparat Anadoly agenttigine silteme jasap.
Túrkııa basshysynyń aıtýynsha, jańa ken ornynyń óndiristik qýaty táýligine 100 myń barrelge baǵalanyp otyr.
«Men jaqsy jańalyqpen bóliskim keledi. Biz Djýdı men Gabarda óndiristik qýattylyǵy táýligine 100 myń barreldi quraıtyn munaı qoryn taptyq», - dedi Memleket basshysy Eýropadaǵy eń iri kún elektr stantsııasynyń (Qarapynar KES) ashylýyna jáne Konıa provıntsııasynda jaqynda aıaqtalǵan basqa da nysandardyń iske qosylýyna arnalǵan saltanatty sharada.
R.Erdoǵan munaıdyń quramy «joǵary sapaly» ekenin atap ótti.
«Qor kúndelikti tutynýymyzdyń onnan bir bóligin óteı alady», - dep qosty el prezıdenti.