Tóńkeris bolatyny jaıly sybys taraǵan: Erdoǵan shuǵyl jıyn ótkizdi

<p>ASTANA. KAZINFORM &ndash; Túrkııada mýnıtsıpaldy saılaý ótti. Bul saılaý aldyndaǵy úgit-nasıhat jumystary eldegi turaqty jaǵdaıdy aıtarlyqtaı shaıqaltty. Túrkııanyń ishki saıasaty taǵy da dúrbeleńge tústi.</p>

Buǵan deıin Parlamentte sóz sóılegen Ultshyl qozǵalys partııasynyń jetekshisi Devlet Bahchelı qylmystyq toptardyń jekelegen ókilderi men burynǵy tártip saqshylary elde tóńkeris uıymdastyrýdy josparlap otyrǵanyn aıtqan.

Osyǵan oraı 14 mamyrdan 15 mamyrǵa qaraǵan túni Túrkııa prezıdenti Rejep Taıyp Erdoǵan eldiń Ulttyq barlaý uıymynyń basshysy Ibragım Kalın men Ádilet mınıstri Iylmaz Týnchtyń qatysýymen shuǵyl jıyn ótkizdi.

Túrli túrik basylymdarynda habarlanǵandaı, 9 mamyrda saıası qastandyq jasady degen kúdikpen Ankara polıtsııa departamentiniń 4 joǵary laýazymdy qyzmetkeri ustaldy. Olardyń esirtki saýdasymen, qarý-jaraqpen, shekarany zańsyz kesip ótýmen jáne ártúrli qylmystarmen baılanysty uıymdasqan qylmystyq toptarǵa qatysy bar. 13 mamyrda kúdiktilerdiń turǵylyqty jerinde tintý júrgizilip, keıbir tsıfrlyq materıaldar tárkilendi.

Keıbir jergilikti BAQ-tyń elde josparlanǵan tóńkeris týraly rezonansty taqyryptaryn nazarǵa alǵan Túrkııa Іshki ister mınıstrliginiń basshysy Alı Ierlıkaıa qastandyq pen bandıtızmniń kez kelgen kórinisine qatysty tıisti sharalar qoldanylatynyn aıtty.

«Terrorıstik uıymdarmen jáne uıymdasqan qylmystyq toptarmen yntymaqtasatyndarǵa qajetti sharalardy qabyldaımyz. Áleýmettik jelini paıdalanyp, qoǵamda alaýyzdyq týǵyzyp, «oıyn oınaýǵa» tyrysatyndardyń basyn kóterýge jol bermeımiz. Mundaı kórinisterdiń joly kesiledi», – dedi A.Ierlıkaıa.