Túrkııa Premer-Mınıstriniń orynbasary: Nazarbaevtyń qoldaýyn kórip kelemiz

ANKARA. QazAqparat - Ankara qalasynda Qazaqstan-Túrkııa dıplomatııalyq qatynasynyń 25 jyldyǵy men Qazaqstannyń Táýelsizdik kúnine oraı qabyldaý uıymdastyryldy, dep habarlaıdy QazAqparat tilshisi.   

Saltanatty shara Ankaradaǵy «Marrıot» qonaq úıinde ótti. Qabyldaýda Qazaqstannyń Túrkııadaǵy Tótenshe jáne Ókiletti Elshisi Abzal Saparbekuly eki el arasyndaǵy yntymaqtastyqqa toqtala ketti.

«Qazaqstannyń Táýelsizdigin alǵash moıyndaǵan Túrkııa Respýblıkasy. Sonymen qatar, dıplomatııalyq qatynas ornatylǵan eń alǵashqy memlekettiń biri de osy baýyrlas túrik eli bolatyn. Eki el arasyndaǵy qarym-qatynastyń ornyǵýyna Qazaqstan Respýblıkasynyń Tuńǵysh Prezıdenti Nursultan Nazarbaevtyń qosqan úlesi orasan zor. Elbasy Qazaqstan Táýelsizdiginiń shırek ǵasyrynda Túrkııamen qarym-qatynasty damytýǵa udaıy mán berip otyrdy. Búgingi tańda eki eldiń saıası-ekonomıkalyq, mádenı-gýmanıtarlyq saladaǵy baılanysy yntymaqtastyqtan ypaldastyqqa jetti», - dedi Qazaqstan Elshisi.

Jıynnyń arnaıy qonaǵy Túrkııa Respýblıkasy Premer-Mınıstriniń orynbasary Hakan Chavýshoǵly qazaq elin Táýelsizdik kúnimen quttyqtady.

«Qazaqstannyń Táýelsizdigin jarııalaǵan kezde biz qazaq elimen birge qýandyq. Óıtkeni, bizdiń tarıhı jáne mádenı tamyrymyz ortaq. Qazaqstan Túrkııaǵa qoldaý kórsetip keledi. Ásirese, Túrkııada byltyr oryn alǵan tóńkeris áreketinen keıin eń birinshi Túrkııaǵa kelip, elge kóńil aıtqan jáne qoldaý bildirgen QR Prezıdenti Nursultan Nazarbaev bolatyn. Qazaqstanmen birge lańkestik uıymdarǵa qarsy kúresimiz jalǵasyp otyr. Túrkııa Prezıdenti Rejep Taıyp Erdoǵannan bastap, barlyq úkimet músheleri jáne túrik halqy Elbasy Nursultan Nazarbaevty túrki áleminiń aqsaqaly sanaıdy. Osy ýaqytqa deıin Túrkııa tarapynan qazaqstandyq 4 938 stýdentke oqý granty bólingen. Qazirgi tańda osy baǵdarlama arqyly 407 stýdent Túrkııada bilim alyp jatyr. Bilim jáne mádenıet salasyndaǵy yntymaqtastyǵymyzdy ary qaraı jalǵastyryp, damytatynymyzǵa senim bildiremin», - dedi Túrkııa Premer-Mınıstriniń orynbasary Hakan Chavýshoǵly.

Qabyldaýda TIKA (Túrik yntymaqtastyq jáne úılestirý agenttigi) tóraǵasy Serdar Chamǵa jáne Túrkııadaǵy Qazaqstannyń qurmetti konsýldary Qazaqstan dıplomatııalyq qatynastarynyń 25 jyldyǵyna arnalǵan estelik medalmen marapattaldy.

Joǵary deńgeıde ótken qabyldaýǵa Túrkııanyń Úkimet músheleri, Parlament depýtattary, dıplomatııalyq mıssııa ókilderi, zııaly qaýym men Túrkııadaǵy qazaq dıasporasy men Qazaqstan azamattary qonaq boldy.

Saltanatty jıynda qonaqtardyń qurmetine arnaıy ázirlengen 1,5 metrlik uzyn kók tústi tort kelýshilerge usynyldy.