Túrkııa portyndaǵy jarylystan zardap shekkender sany 12-ge jetti

YSTANBUL. QazAqparat – Túrkııanyń Derındje portyndaǵy jarylystan zardap shekkender sany 12 adamǵa jetti. Jarylys kemelerge astyq tıeıtin aımaqta bolǵan, dep habarlaıdy QazAqparat euronews.com-ǵa silteme jasap.

Kúshti jarylys keshe Ystanbuldan 100 shaqyrym jerde, Mármár teńizi jaǵalaýynda ornalasqan Kodjaelı provıntsııasyndaǵy iri kommertsııalyq port – Derındjede bolǵan. Buǵan deıin 10 adamnyń zardap shekkeni habarlanǵan edi.

Jarylys elevatorlardan kemelerge astyq tıeıtin aımaqta bolǵan. Elevatorlar Túrkııa astyq keńesine tıesili.

«Naqty derekter boıynsha, jarylys saldarynan 12 adam jaralandy, ekeýiniń jaǵdaıy aýyr. Jarylys 16 elevatordyń 13-in búldirgen», - dep habarlady Kodjaelı qalasynyń meri Tahır Bıýıýkakyn.

Jarylys sebepteri tekserilip jatyr. Porttyń konteınerlik ınfraqurylymy zaqymdalǵan joq.