Túrkııa men Italııadan kelgen baıqaýshylar saılaýǵa qatysty pikir bildirdi

ASTANA. QazAqparat – Túrkııa, Serbııa jáne Italııadan kelgen baıqaýshylar Qazaqstandaǵy saılaýǵa qatysty pikir bildirdi. Halyqaralyq baıqaýshylar daýys berý zań talaptaryna sáıkes júrip jatqanyn aıtty, dep habarlaıdy QazAqparat tilshisi.

«Saılaý ýchaskelerinde reglamenttiń, rásimderdiń oryndalýy barysyna erekshe mán berdim. Túske deıin birneshe saılaý ýchaskesinde boldym. Osy oraıda zańnama talaptaryn buzý derekteri anyqtalmaǵanyn aıta alamyn. Saılaýdy uıymdastyrý deńgeıi óte jaqsy», - dedi Halyqaralyq saıasat jáne ekonomıka ınstıtýtyndaǵy Eýrazııalyq zertteýler ortalyǵynyń (Serbııa) basshysy Dýshan Prorokovıch elordadaǵy Halyqaralyq baıqaýshylarǵa qolǵabys kórsetý ortalyǵynda ótken brıfıngide.

Sonymen qatar «Eýrazııa» geosaıası zertteýler jýrnalynyń (Italııa) úılestirýshisi Stefano Vernole Astanadaǵy úsh saılaý ýchaskesine barǵanyn jáne saılaýshylardyń daýys berý protsesine qatysýy qarqyndy ekenin aıtty.

Budan bólek, «Marmara group» qorynyń (Túrkııa) basshysy doktor Mehmet Akkan Sýver Qazaqstanda depýttardy saılaý protsesi demokratııalyq qaǵıdalarǵa sáıkes ótip jatqanyn aıtty.

«Tańerteńgi sýyqqa qaramastan, qaladaǵy 10 saılaý ýchaskesine bardym. Daýys berýge jáne eldiń saıası ómirine qatysyp, óz jaýapkershiligin sezinip otyrǵan adamdardy kóp kezdestirdim. Bul jaǵdaı Qazaqstannyń demokratııany ilgeriletýdegi aıqyn qadamyn baıqatyp otyr. Ásirese, saılaýǵa kelip jatqan jastar ózderiniń ustanymyn bildirip, eldiń bolashaǵyna eleýli úlesin qosyp otyr», - dedi Mehmet Akkan Sýver.