Túrkııa koronavırýs vaktsınasyn klınıkalyq synaqtan ótkize bastady

ANKARA. Anadoly-QazAqparat – Túrkııalyq vaktsına osy jyldyń aıaǵyna deıin daıyn bolýy múmkin. Bul týraly Indýstrııa jáne tehnologııalar mınıstri Mustafa Varank málimdedi, dep habarlaıdy QazAqparat Anadoly agenttigine silteme jasap.

Mınıstrdiń aıtýynsha, vaktsınanyń klınıkalyq synaǵy senbi kúni tańerteń bastaldy.

«Bul - kúrdeli protsess, synaqtyń birinshi fazasy eki aıdan erte bitpeıdi», - dedi Varank.

Vedomstvo basshysy vaktsınany óndirýge daıyn kásiporyndardyń bar ekenin atyp ótti.

«Eger barlyq kezeńdi sátti qorytyndylasaq, jyldyń sońyna deıin bizdiń 50 mln doza áleýeti bar óz vaktsınamyz bolady», - dep qosty ol.

Mınıstr vaktsınatsııanyń ekinshi kezeńinde ózi erikti bolatynyn aıtty.

Sonymen qatar Varank muryn arqyly egiletin vaktsınanyń óndirisine de toqtaldy.

«Aqýyz negizinde jasalǵan vaktsınanyń bul túri – álemdegi jańalyqtardyń biri. Bul vaktsına muryn arqyly egiledi. Barlyq ýytty synamalar alynyp, janýarlarda synalyp, qosymsha jumystar atqarylǵan. Túrkııanyń Farmatsevtıka jáne medıtsınalyq jabdyqtandyrý agenttigine hat joldandy. Eger olar oń jaýap qaıtarsa, adamdarǵa klınıkalyq synaq jasaý bastalady», - dep málimdedi mınıstr.

Varank muryn arqyly egiletin vaktsına ınnovatsııalyq ekenin atap ótti. Onyń qoldanylýy álemde keń taralmaǵan.

«Degenmen óndirýshilerdiń aldyn ala qorytyndysy, zerthanalyq zertteýler men janýarlarǵa jasalǵan synama jaqsy nátıje kórsetýde. Klınıkalyq synama sátti aıaqtalady degen úmittemiz», - dep úmit bildirdi vedomstvo basshysy.

Varanktyń aıtýynsha, túrli elder Túrkııadan vaktsınamen qamtamasyz etýde kómek suraǵan.

«Keı elder vaktsına tasymaldaýda kómek suraıdy, keı elder ortaq óndiristi jolǵa qoımaq nıette. Mysaly, keıbir elder synaqtyń úshinshi fazasyn birge ótkizýdi usynyp otyr. Bul áriptestik protsestiń uzaqtyǵyn qysqartar edi, sonymen qatar protseske halyqaralyq ózektilik berer edi. Sonymen qatar bul elder tasymaldaý máselesinde birinshi qaralady. Shetelden suranys bar», - dedi Varank.