Túrkııa Qazaqstannyń et ónimderine qoıylǵan shekteýdi alyp tastady

<p>ASTANA. KAZINFORM - 2024 jylǵy 7 maýsymnan bastap Qazaqstandyq ónimdi Túrkııa naryǵyna jetkizýge kedergi bolǵan birqatar shekteýler alynyp tastaldy. 2005 jyldan beri qus tumaýy boıynsha, 2016 jáne 2022 jyldardan beri aýsyl jáne nodýlıarlyq dermatıt boıynsha shekteýler qoldanylyp kelgen bolatyn, dep habarlaıdy QR AShM baspasóz qyzmeti.&nbsp;</p>

2024 jyldyń naýryz aıynda Qazaqstan Respýblıkasynyń Aýyl sharýashylyǵy mınıstri Aıdarbek Saparov Túrki memleketteri uıymyna múshe elder mınıstrleriniń Tarazda ótken kezdesýinde kedergiler máselesin kótergen bolatyn.

"Qazaqstan Túrkııa, Túrikmenstan jáne Majarstan naryǵyna joǵary sapaly et ónimderin jetkizýge daıyn ekenin bildiredi. Ókinishke qaraı, búgingi tańda Túrkııa naryǵy veterınarlyq qyzmetter jelisi boıynsha qazaqstandyq jetkizýshiler úshin is júzinde jabyq. Bıylǵy jyldan bastap QHR men RF tarapynan Qazaqstanǵa qatysty osyndaı shekteýler alynyp tastalǵanyn atap ótkim keledi. Osyǵan baılanysty túrik tarapymen de osy máseleni qaraýǵa qaıta oralýǵa bolady dep esepteımiz", - dep atap ótti Aıdarbek Saparov. Kedergilerdi alyp tastaý máseleleri Túrkııa Respýblıkasy aýyl sharýashylyǵy mınıstriniń orynbasary Gızlıgıder Ebýbekırmen ekijaqty kezdesý barysynda keńinen talqylandy.

Túpkilikti sheshim aǵymdaǵy jyldyń mamyr aıynda Dúnıejúzilik janýarlar densaýlyǵy uıymynyń 91-shi sessııasy aıasynda QR aýyl sharýashylyǵy vıtse-mınıstri A.Berdalınniń Túrkııanyń aýyl sharýashylyǵy vıtse-mınıstri A.Gıýmenmen ótkizgen ekijaqty kelissózder nátıjesinde qabyldandy.

Túrik tarapy Qazaqstan usynǵan esepterdi taldap, Dúnıejúzilik janýarlar densaýlyǵy uıymyna (DJDU) usynyp, bizdiń elimizdiń osy aýrýlarmen kúresý jáne olardy joıý jónindegi áreketterin joǵary baǵalady. Bul sheshim Qazaqstandaǵy agrobıznestiń jańa perspektıvalaryn jáne mal sharýashylyǵy ónimderine qoıylatyn veterınarııalyq talaptardy úılestirý múmkindikterin keńeıtedi, osy elder arasyndaǵy saýda qatynastaryn nyǵaıtýdaǵy mańyzdy qadam bolmaq.

Qazaqstandyq mal sharýashylyǵy ónimderin ilgeriletýdiń kelesi qadamy veterınarııalyq talaptardy úılestirý bolmaq. Bul máseleler de aǵymdaǵy jyldyń tamyz aıynda Aıdarbek Saparovtyń Túrkııa Respýblıkasyna sapary barysynda talqylanatyn taqyryptar tizimine enetin bolady.

Eske salaıyq, búgingi tańda Qazaqstannyń birqatar óńirlerinde qoı men eshki sheshegi boıynsha shekteýler áli de bar. Qalǵan tosqaýyldardy alyp tastaý úshin QR AShM veterınarııalyq qyzmeti qajetti sharalardy qabyldaıdy.