Túrkııa fýtbol sýperlıgasynda eki komanda jarysty jalǵastyrmaıtyn boldy

ASTANA. QazAqparat - Túrkııa jerinde bolǵan joıqyn zilzala sol eldiń fýtbol salasyna da keri áserin tıgizdi. Tabıǵı apat bolǵan aımaqta ornalasqan eki qalanyń atynan sýperlıgada synǵa túsetin «Hataıspor» jáne «Gazıantep» komandalary birinshiliktiń qalǵan oıynyn jalǵastyra almaıtynyn jetkizdi, dep habarlaıdy QazAqparat tilshisi.

Bıyl sýperlıgada barlyǵy 19 komanda oıyn kórsetip kele jatqan bolatyn.

Eki klýbtyń atalǵan sheshiminen keıin qatysýshy sany 17-ge qysqardy. Dop dodasy 17 aqpannan bastap qaıta jalǵasady.

«Gazıantep» komandasynyń basshylyǵy atalǵan sheshimin resmı saıtynda aýyr apattan keıin fýtbol jaıynda aıtýdyń ózi aýyr ekenin aıtyp, qazirgi ýaqytta sporttyq qyzmetin jalǵastyrýdyń múmkindigi joq ekenin jetkizdi. Osyǵan baılanysty komanda 2022/2023 jylǵy maýsymda Túrkııa sýperlıgasy men kýbogynan bas tartatynyn málimdedi.

Qazirgi ýaqytta «Gazıantep» sýperlıgada 10-orynda keledi. Degenmen komanda eýrokýbokqa qatysý múmkindiginen góri tómengi lıgaǵa túsip qalýǵa jaqyn.

Túrkııa kýbogynda shırek fınalǵa deıin jetti. Jarystyń atalǵan satysynda 28 aqpan men 4 naýryz kúnderi «Sıvasspor» klýbymen oınaýy tıis bolatyn.

«Gazıantep» sapynda Qazaqstan quramasy men Italııanyń «Mılan» klýbynyń burynǵy jartylaı qorǵaýshysy Aleksandr Merkel oıyn kórsetti. Sondaı-aq, rýmynııalyq Aleksandrý Maksım komanda namysyn qorǵady.

Al «Hataıspor» atalǵan eldiń fýtbol federatsııasyna óz sheshimin 6 aqpan kúni jarııa etti.

Atalǵan komandanyń birneshe ókili zilzala saldarynan zardap shekti. Komanda sapyndaǵy Býrak Oksıýz, Bertýg Iyldyrym jáne Kerım Alydjı tabıǵı apat saldarynan bolǵan turǵyn úıindisinen qutqaryldy.

Oǵan qosa qutqarýshylar bapkerler sapyndaǵy Ekrema Ekshıoglý jáne Osmana Ateshtiń de ómirin saqtap qaldy.

«Hataıspor» komandasy «Gazıantep» sekildi el birinshiliginde tómengi oryndarda kele jatty. Atalǵan ujym qazirgi sátte 14-orynda tur.

Klýb sapynda marokkolyq Aıýb El-Kaabı syndy belgili oıynshylar bar. Al Anglııanyń «Chelsı» jáne Gana quramasynda oınaǵan Krıstıan Atsý zilzala saldarynan bolǵan úıindi astynda qalyp qoıdy.

Dál osyndaı jaǵdaıǵa «Hataıspordyń» sporttyq dırektory Taner Savýt ta ushyrady. Qutqarýshylar áli kúnge deıin olardy taba almaı otyr.

Qoldaǵy málimetke sáıkes «Gazıantep» jáne «Hataıspor» komandalarynyń birinshiliktegi qalǵan oıyndaryna tehnıkalyq jeńilis jazylady.

Soǵan qaramastan olar sýperlıgadaǵy ornyn saqtap qalady.

Eske sala keteıik, 6 aqpan kúni Túrkııanyń Kahramanmarash-Pazardjık aýdanynda 7,7 ball qýatymen jáne Elbıstanda 7,6 ball qýatymen jer silkindi.

Jerasty dúmpýi eldiń 10 provıntsııasynda, sondaı-aq kórshiles elderde, sonyń ishinde Sırııada sezildi. Artynan 648 aftershok bolǵan.

Prezıdent Rejep Taııp Erdoǵan Túrkııada jeti kúnge jalpyulttyq aza tutý kúnin jarııalady. El aýmaǵynda barlyq memlekettik tý túsirildi.

Zilzaladan qaza tapqandar sany 31 myńnan asyp ketti.

Foto: BSR AGENCY/GETTY IMAGES