Túrkııa elshisi Qazaq-Túrik lıtseılerine qatysty pikir bildirdi

ASTANA. QazAqparat - Qazaq-Túrik bilim berý mekemelerine Túrkııanyń esh qatysy joq. Bul týraly Túrkııanyń Qazaqstandaǵy Tótenshe jáne ókiletti elshisi Nevzat Ýıanyk málim etti.

«Qazaqstan men Túrkııanyń resmı bıliginiń qoldaýymen ashylǵan jalǵyz bilim ordasy bar, ol - Ońtústik Qazaqstan oblysy Túrkistan qalasynda ıAssaýı atyndaǵy Qazaq-Túrik ýnıversıteti. Qazaqstanda Qazaq-Túrik ataýy bar bilim mekemeleri Túrkııanyń resmı bıligine túk qatysy joq. Olardyń qyzmetine qatysty barlyq sheshimdermen Qazaqstannyń quzyrly organdary, Qazaqstannyń Bilim jáne ǵylym mınıstrligi aınalysady», - dep atap ótti ol.

Onyń aıtýynsha, Qazaq-Túrik lıtseıleriniń ishki máselelerimen Qazaqstan bıligi aınalysady jáne elshilik olardyń jumysyna qatysty máselelerdi talqylaı almaıdy. Degenmen onyń sózi boıynsha, Túrkııada búlik jasaýshy lańkestik uıymnyń tamyry barsha álemge tarap otyr. «Olar xalyqtyń aqshasyna satyp alynǵan tanktermen, ushaqtarmen memleketti basyp almaq boldy. Túrkııadaǵy tóńkeris 30 jyl boıy uıymdastyrylǵan. Olar óte qaýipti ekeni anyq. Sondyqtan olardyń tamyry jaıylǵan memleketter osyny eskerýi tıis», - dedi elshi myrza. 

Aıta keteıik, 15 shilde kúni Ystambulda áskerı búlik oryn alyp, 200-den astam beıbit azamat qaza tapty. Qazirgi ýaqytta 10 myńnan astam búlikshi ustaldy, búlik barysynda olardyń 100-ge jýyǵy óltirildi. Bul kóteriliske «Túrik Qarýly kúshterine enip alǵan Fetxýllaxshyl lańkestik uıymy uıymdastyrdy» dep jarııalandy.

Osyǵan oraı, Qazaqstanda qoǵam arasynda KATEV qorymen qurylǵan Qazaq-Túrik lıtseıleriniń taǵdyry taqyryby qyzý talqyǵa túse bastady.