Túrkııa elimizdiń ekonomıkasyna eń kóp ınvestıtsııa baǵyttaǵan 10 memlekettiń biri – Murat Nurtileý

ASTANA. QazAqparat – Elimizde Túrkııa kapıtalymen 4,3 myń kompanııa jemisti jumys atqaryp keledi. Muny elimizge resmı saparmen kelgen Túrkııanyń Syrtqy ister mınıstri Hakan Fıdanmen kezdesken QR Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Orta jáne shaǵyn kásipkerler qurǵan kásiporyndar boıynsha da eleýli nátıjege qol jetkizdik. Túrkııanyń kapıtalymen elimizde 4 300-den astam kompanııa jemisti jumys atqarýda. Osy ýaqytqa deıin Túrkııa Qazaqstan ekonomıkasyna 4,7 mlrd dollar kóleminde tikeleı ınvestıtsııa quıyp, eń iri ınvestorlardyń ondyǵyna kirdi. Búgingi tańda 31 ınvestıtsııalyq joba júzege asyrylýda, oǵan qosa 50 jańa joba pysyqtalyp jatyr. Bıyl bul úrdis jalǵasyp, birinshi toqsannyń qorytyndysy boıynsha elimizge kelgen túrik kapıtaly 112 mln dollardy qurady», - dedi Murat Nurtileý.

Mınıstrdiń málimdeýinshe, Túrkııa men Qazaqstan bolashaqta ınvestıtsııa kólemin ulǵaıtýǵa múddeli.

Sonymen qatar vedomstvo basshysy qarashada Túrkistan qalasynda ótetin Túrki memleketteriniń mereıtoılyq 10-shy sammıtine qatysý úshin Túrkııa Prezıdenti Rejep Taııp Erdoǵan keletinin atap ótti.

Buǵan qosa, bıyl 7 aıda Qazaqstan men Túrkııa arasyndaǵy saýda aınalymy 3,6 mlrd dollarǵa jetti.