Túrkııa bıznesmenderi úshin Qazaqstan qaı turǵyda tartymdy - Dáýren Abaev
«Búgingi tańda Túrkııa ekonomıkasynda týyndaǵan qıyndyqtar eshkimge de qupııa emes. Túriktiń lırasy dollarǵa qatysty birshama qunyn joǵaltty. Ózińiz elestetip kórińiz, jyl basynan beri túrik valıýtasy 70 paıyzǵa deıin álsiregen. Máselen, teńge dollarǵa qatysty qańtar men qyrkúıek aralyǵynda shamamen 13 paıyzǵa arzandady. Mine, týyndaǵan qıyndyqtar aıasynda Batystaǵy seriktesterimen qarym-qatynasta Túrkııa belsendi túrde birshama jol izdep jatyr. Osynyń aıasynda bizdiń Prezıdenttiń sapary óte yńǵaıly ýaqytta jasaldy», - dedi mınıstr.
Dáýren Abaev sapar aldynda ótkizilgen bıznes-forýmda (Qazaqstan - Túrkııa) shamamen jalpy quny 1,7 mlrd AQSh dollaryn quraıtyn 22 kommertsııalyq qujatqa qol qoıylǵanyn eske saldy. Sonymen birge, osy joly Túrkııa Respýblıkasynyń basshylyǵymen kezdesýmen qatar, Memleket basshysy 25 túrkııalyq iri bıznesmenmen kezdesken.
Mınıstr sonymen qatar, túrik bıznesi úshin Qazaqstan qanshalyqty tartymdy bola alatynyn túsindirdi.
«18 mıllıon halqy bar Qazaqstan - ınvestıtsııalyq tartymdylyǵy asa joǵary emes aımaq ekenin túsinýimiz kerek. Biraq, biz Eýrazııalyq ekonomıkalyq odaqqa kiremiz. Al bul - 180 mıllıondyq naryq. Túrik bıznesmenderi Qazaqstanda jumys isteıtin bolsa, osy alyp naryqtan paıda taba alady. Bizdiń Prezıdenttiń túrik bıznesmenderimen kezdesý kezinde aıtqanyndaı, «ınvestorlar úshin protsedýralardy qaı tustan jeńildete alatynymyzdy kórsetińizder». Biz ony túzete alamyz», - dedi Dáýren Abaev.
Sonymen birge, mınıstr Túrkııada Nursultan Nazarbaevqa nelikten úlken yqylaspen ári qurmetpen qaraıtynyn aıtyp berdi.
«Onyń sebepteri kóp. Túrkııa men Reseı basshylarynyń qaıta dostasýynyń ózinde, ózderi moıyndaǵandaı, qazaqstandyq kóshbasshynyń eńbegi bar. Munyń ózi kóp nárseden habar beredi. Biz de Qazaqstannyń táýelsizdigin birinshi bolyp moıyndaǵan baýyrlas Túrkııanyń basshylyǵyna óte úlken qurmetpen qaraımyz. Zor abyroı sol ýaqyttyń ózinde qalyptasyp qoıǵan», - dedi mınıstr.