Túrkııa 2054 jylǵa qaraı kómirtek shyǵaryndysyn nóldik deńgeıge jetkizbek

<p>ASTANA. KAZINFORM &ndash; Túrkııa aldaǵy 30 jyl ishinde kómirtek shyǵaryndylaryn nóldik deńgeıge jetkizýdi kózdep otyr, dep habarlaıdy Kazinform-nyń menshikti <a href="https://www.inform.kz/ru/turtsiya-stremitsya-k-ekonomike-s-nulevim-urovnem-uglerodnih-vibrosov-k-2054-godu-dd331b" target="_blank" rel="noopener">tilshisi.</a></p>

Eldiń Energetıka jáne tabıǵı resýrstar mınıstri Alparslan Baıraktar úkimet ekonomıkanyń negizgi sektorlaryna, sonyń ishinde energetıka, kólik, ónerkásip jáne aýyl sharýashylyǵyna áser etetin kómirqyshqyl gazynyń shyǵaryndylaryn azaıtý boıynsha keshendi sharalar ázirlep, júzege asyrýdy josparlap otyrǵanyn atap ótti.

Onyń aıtýynsha, nóldik kómirtekti ekonomıkaǵa kóshý – bul ekologııalyq máseleni sheshý ǵana emes, sonymen qatar jańa jumys oryndaryn qurý jáne ınvestıtsııa tartý múmkindigin beredi.

«Bul maqsatty júzege asyrý klımattyń ózgerýine qarsy kúreste jáne eldiń turaqty ekonomıkaǵa kóshýinde mańyzdy qadam bolmaq. Biz bolashaqqa optımıstik kózqaraspen qarap, óskeleń urpaqtyń turaqty damýyn qamtamasyz etýge nıettimiz», – dedi A.Baıraktar.

Atap aıtqanda, jańartylatyn energııany damytý, ónerkásip pen turǵyn úı sektorynda energııa tutynýdy azaıtý úshin jańa tehnologııalardy engizý, «jasyl sýtegi» óndirisin damytý jáne kóliktegi shyǵaryndylardy azaıtý kózdelgen. Elde elektr kólikterdi paıdalanýdy yntalandyrý jáne ekologııalyq taza qoǵamdyq kólikti damytý josparlanýda.

Alǵa qoıǵan maqsattarǵa jetý úshin Túrkııa halyqaralyq uıymdarmen jáne seriktestermen yntymaqtastyqty nyǵaıtpaqshy. Atap aıtqanda, el Parıj kelisimin júzege asyrýǵa baǵyttalǵan bastamalarǵa qatysyp, ekologııalyq jobalarǵa qarjy tartýǵa úmittenýde.

Aıta keteıik, BUU-nyń Klımattyń ózgerýi boıynsha negizdemelik konventsııasynyń 29-konferentsııasy (COP29) aıasynda Baký qalasynda ótken Klımat jónindegi Dúnıejúzilik sammıtte Túrkııanyń ıadrolyq energııany úsh esege arttyrý bastamasyna qol qoıyldy.

Osyǵan deıin Túrkııada balalardyń áleýmettik jeli men smartfon paıdalanýyna shekteý engiziletini týraly habarladyq.