Túrkitildes memleketterdiń Syrtqy ister mınıstrleri Túrki keńesine Ózbekstannyń kirýin quptady

NUR-SULTAN. QazAqparat – Ázerbaıjan astanasy Baký qalasynda Túrkitildes memleketter yntymaqtastyǵy keńesiniń (TMYK, Túrki keńesi) VII Sammıti qarsańynda Túrki keńesi Syrtqy ister mınıstrleriniń otyrysy ótip, oǵan Mınıstr Muhtar Tileýberdi qatysty. Bul týraly QR SІM baspasóz qyzmeti habarlaıdy.

Mınıstrlik kezdesýler Túrki keńesi memleketteri basshylarynyń kezdesýleri men sheshimderin ázirleýdiń mazmundy jáne uıymdastyrýshylyq máselelerin talqylaý maqsatynda jyl saıyn ótkiziledi. Kezdesý barysynda Mınıstrler kún tártibiniń jáne qorytyndy qujattardyń jobalaryn kelisti, olarǵa qol qoıý jáne bekitý memleket basshylary keńesiniń otyrysynda josparlanyp otyr. Іs-shara barysynda 7-shi sammıt Deklaratsııasynyń qabyldanýy jáne Túrki yntymaqtastyǵy uıymdarynyń úılestirý komıtetin qurý týraly sheshim, sondaı-aq TMYK Hatshylyǵy men Vengrııa Úkimeti arasyndaǵy TMYK Ókildigin Býdapeshtte ornalastyrý týraly kelisimge qol qoıý kútilýde. Budan basqa, TMYK memleketteriniń basshylary Ózbekstan Respýblıkasynyń TMYK-ty qurý týraly Nahchyvan kelisimine qosylýy jóninde Birlesken málimdemeni bekitýdi josparlap otyr.

Baký qalasynda ótken kezdesý qorytyndysy boıynsha mınıstrler 2019 jyly 19 qyrkúıekte Býdapesht qalasynda (Vengrııa) ashylǵan Túrki Keńesi ókildiginiń qyzmetin retteıtin birqatar qujattarǵa qol qoıdy. Atalǵan qujattar jańa túrki uıymdarynyń uıymdyq jáne qarjylyq qyzmetin rettep, olardyń túrki álemi memleketteri men halyqtarynyń ıgiligi úshin odan ári jemisti qyzmetine yqpal etetin bolady.

Mınıstrlerdiń jeke sheshimimen Vengrııaǵa Túrki mádenıeti men murasy qory janyndaǵy baqylaýshy mártebesi berildi.

Túrkitildes memleketter yntymaqtastyǵy keńesi Qazaqstan Respýblıkasynyń Tuńǵysh Prezıdenti - Elbasy Nursultan Nazarbaevtyń bastamasymen 2009 jyly Nahychevan qalasynda (Ázerbaıjan) quryldy. Túrki keńesiniń hatshylyǵy Stambýl qalasynda (Túrkııa) ornalasqan. 7-shi sammıttiń qorytyndysy boıynsha Ózbekstan qosylǵannan keıin Keńes músheleriniń sany beske jetedi (Ázerbaıjan, Qazaqstan, Qyrǵyzstan, Túrkııa jáne Ózbekstan).

SІMK aıasynda Mınıstr M. Tileýberdi Ázerbaıjan, Túrkııa jáne Vengrııanyń Syrtqy ister mınıstrlerimen bólek kezdesýler ótkizip, olardyń barysynda osy eldermen ekijaqty yntymaqtastyqty odan ári damytý perspektıvalary talqylady.