Túrkitildes elderge ortaq 10 pılottyq anımatsııalyq joba jaryq kóredi

ASTANA. QazAqparat – «Qazaqanımatsııa» shyǵarmashylyq birlestigi otandyq 10 anımatsııalyq stýdııamen birge túrkitildes elderge ortaq ejelgi ańyzdarǵa negizdelgen pılottyq anımatsııalyq jobanyń óndirisin bastady, dep habarlaıdy QazAqparat.

Mádenıet jáne sport mınıstrliginiń málimetinshe, anımatsııalyq almanahqa kiretin ár týyndynyń hronometrajy 5 mınýttan asady. Óndiriske jiberilgen 10 joba arnaıy uıymdastyrylǵan baıqaý nátıjesinde iriktelip alyndy.

Konkýrsqa túrkitildes elderdiń uly tulǵalary, qasıetti janýarlary men jer-sý ataýlary, túrkitildes elderdiń ortaq merekeleri men ulttyq oıyn-saýyqtary týraly ańyzdar negizinde jazylǵan 26 stýdııadan 40 stsenarıı qabyldandy. Ashyq qorǵaý qorytyndysy boıynsha «Úsh Arys», «Shyraq batyr men búrkit jaıly ańyz», «Leıla. Túrki Patshaıymynyń qupııasy», «Ashına – birinshi kóktúrik», «Turan», «Altyn kól», «Ahmet», «Qojanasyr jáne ury», «Sýyndar» jáne «Jumaq degenimiz...» atty 10 anımatsııalyq joba qoldaýǵa ıe boldy.

«Óndiriske jiberilgen pılottyq anımatsııalyq jobalar janr jaǵynan da, taqyryp boıynsha da bir-birine uqsamaıdy. Árqaısysy ózindik ereksheligimen daralanady. Bul joba túrkitildes memleketter arasyndaǵy yntymaqtastyqty nyǵaıtyp qana qoımaı, qazaqstandyq stýdııalarǵa jańa naryqtarǵa shyǵyp, kórermen aýdıtorııasyn keńeıtýge múmkindik beredi. Sondaı-aq bul – bolashaqta baýyrlas eldermen birlesken anımatsııalyq jobalar jasaýdyń alǵashqy qadamy», - dedi mınıstrliktiń Mádenıet komıteti tóraǵasynyń mindetin atqarýshy Kúmis Seıitova.