Túrkitildes elder óz dıasporasymen baılanys boıynsha tájirıbelerimen bólisti

BAKÝ. QazAqparat - QR Qoǵamdyq damý mınıstrligi men «Otandastar qory» ókilderi Bakýdegi Túrkitildes memleketterdiń yntymaqtastyq keńesiniń janyndaǵy dıasporamen jumys jónindegi baılanys tobynyń besinshi otyrysyna qatysty, dep habarlaıdy Ázerbaıjandaǵy QazAqparattyń menshikti tilshisi.

QR QDM Qoǵamdyq kelisim komıteti Etnosaralyq kelisim jáne dıasporalarmen ózara is-qımyl basqarmasy bastyǵy Meıram Imanbaev túrki elderi arasynda mádenı-gýmanıtarlyq balanystar óte maǵyzdy ekenin aıta kele, bizdiń elderdiń tarıhı, mádenı jaqyndyǵymyz birlese jumys isteýdi mindetteıtinin jetkizdi.

«Osyndaı aýqymdy iste dıaspora máseleleri boıynsha Túrki keńesi sekildi qurylymdardyń róli erekshe. Bul shara bolashaqta ońtaıly nátıjeler beretin qatynastarǵa negiz bolatynyna senimdimin», - dedi M. Imanbaev.
Osy oraıda ol Bakýde ótip jatqan talqylaýlar barysynda basqa elderdegi áriptestermen jumys baǵyttary pysyqtalatynyn atap ótti. Sonymen qatar, sapar aıasyndaǵy negizi sharalar Ázerbaıjandaǵy dıasporamen jumys jónindegi komıtettiń qyzmetimen tanysýǵa arnalmaq.
M. Imanbaevtyń aıtýynsha, búginde Qazaqstanda dıasporamen jumys boıynsha sheteldik tájirıbe zerttelip jatyr, sondaı-aq olarmen jumys isteýge qatysty qurylymdy qurý máselesi pysyqtalýda. Osy baǵyt aıasynda QR Qoǵamdyq damý mınıstrligi Úkimet aldynda dıasporamen jumys boıynsha qurylymdy qurý usynysyn kóterýde.

Óz kezeginde TúrkPA Bas hatshysynyń orynbasary, uıymdaǵy QR ókili Naýryz Aıdarov shetelde turatyn ázerbaıjandyqtarmen turaqty baılanysty ornatý úshin qurylǵan Ázerbaıjandaǵy dıasporamen jumys boıynsha komıtettiń tájirıbesin zertteý kerektigin aıtty.
Bul qadam ár memleket úshin ońtaıly bolatynyna toqtalǵan ol, osy tektes vedomstvony Qazaqstanda da qurý qajettigin tilge tıek etti. Atalǵan qurylym elimizde sheteldegi qazaq dıasporasymen qarym-qatynasty nyǵaıtýǵa óz úlesin qosa alady.

Avtor: Bekbaý Taımanov