Túrkistannyń oblys ortalyǵy retinde qaıta qurylýy tarıhı ári ádil sheshim - Máýlen Áshimbaev
«Shejiresi tereńnen syr shertetin shyraıly Shymkent shaharynyń respýblıkalyq mańyzy bar qalalardyń qataryna qosylýy el tarıhyndaǵy eń eleýli oqıǵalardyń biri ekeni sózsiz. Sebebi, tabıǵaty janǵa jaıly, qazaqy qaımaǵy buzylmaǵan, halqy eńbekqor Shymqala buǵan deıin de ulttyq rýhtyń uıytqysy, ádet-ǵuryptyń altyn besigi sanalyp keldi. Sondyqtan da qalanyń ózge oblys ortalyqtarynan artyqshylyǵy burynnan baıqalatyn desek, artyq aıtqandyq bola qoımas»,-deıdi Máýlen Áshimbaev.
Sondaı-aq ol shymkenttikterdiń iske beıim, básekege qabilettiliginiń ózi olardyń kez kelgen kásipti dóńgeletip áketýine mol múmkindik beretindigin aıtady. Sonyń arqasynda qala halqy ekonomıkalyq jáne áleýmettik damýda aıtarlyqtaı nátıjelerge de qol jetkizdi. Munyń bári shahardyń oblystan da joǵary mártebeni ıemdenýge laıyq ekenin dáleldeı túsedi.
Endi elimizdegi basty úsh megapolıstiń biri retinde bul qala damýdyń jańa satysyna qadam basty. Osylaısha Elbasy búgingi Jarlyǵymen Shymkenttiń odan ári shyńdalyp, shıraı túsýine dańǵyl jol ashyp berdi.
Sonymen qatar Maǵjan aqyn «er túriktiń besigi» dep jyrǵa qosqan Túrkistannyń oblys ortalyǵy bolýyn da erekshe atap ótken jón. Buny tek túrkistandyqtar úshin ǵana emes, tutas qazaq halqy úshin asa mańyzdy oqıǵalardyń biri dep bilemin. Sebebi, osyǵan deıin rýhanı astanamyz retinde atalyp kelgen qalaǵa endi bildeı bir oblystyń júgi júktelip otyr. Bul, árıne, qalanyń ósip-órkendeýine oń áserin tıgizetin ıgilikti is. Sonyń arqasynda keshe kúlli túrki áleminiń altyn ordasy bolǵan Túrkistannyń qaıtadan túlep, túrlenetin, táýelsizdik tuǵyrynyń bıikteı túsýine ózindik úles qosatyn kezeń týyp otyr.
«Osyndaı basymdyqtardy eskerip, Elbasynyń Shymkentke respýblıkalyq mańyz berip, Túrkistandy oblys ortalyǵy retinde qaıta qurýyn tarıhı ári ádil sheshim dep esepteımin. Bul tek eki qala halqyna ǵana emes, barsha ońtústik jurtyna júktelgen zor jaýapkershilik.
Osyǵan oraı Shymkent qalasy men Túrkistan oblysynyń turǵyndaryn tarıhı oqıǵamen shyn júrekten quttyqtaı otyryp, óńirdiń odan ári ósip-órkendeýine tilektestigimdi bildiremin.
Alty alashqa saýyn aıtqan aqjoltaı jańalyq qutty bolsyn, aǵaıyn!»,-dep jazdy Máýlen Áshimbaev.