Túrkistannyń qazirgi deńgeıi úshin Elbasy eńbegin qalaı baǵalasa da jarasady - Darhan Myńbaı

NUR-SULTAN. QazAqparat – Túrkistandy qazirgi deńgeıge jetkizgeni úshin Elbasy eńbegin qalaı baǵalasa da jarasady. Májilis depýtaty Darhan Myńbaı Túrkistanda Elbasy Nursultan Nazarbaevqa eskertkish ornatýǵa qatysty osyndaı pikir bildirdi, dep habarlaıdy QazAqparat tilshisi.

«Jalpy, túrki álemi úshin ortaq jobalar bar. Jaqynda «Túrkistan – Túrki áleminiń rýhanı astanasy: ıntegratsııa jáne yntymaqtastyq perspektıvalary» atty halyqaralyq konferentsııaǵa qatystyq. Meniń oıymsha, qazirgi kezde túrli ekonomıkalyq baılanystar artyp jatqan kezde, Túrkistannyń búkil túrki jurtynyń qara shańyraǵy mártebesi turǵysynda osy jerdiń jańa dáýirin bastaýǵa múmkindik berip otyrǵan Elbasynyń tarıhı sheshimi myńyzdy dep oılaımyn. Ony eshkim de joqqa shyǵara almaıdy. Sondyqtan Túrkistandy jańa dáýirge bastaǵan, soǵan múmkindik jasaǵan, barsha túrki memleketteriniń basshylaryn ılandyrǵan Elbasynyń eńbegi óte orasan. Buǵan deıin Qazaqstannyń Tuńǵysh Prezıdenti bul sheshimdi burynnan oıynda júrgenin de aıtqan bolatyn», - dedi D. Myńbaı.

Depýtattyń paıymynsha, Túrkistan uǵymy qazaq úshin ári túrki álemi úshin oblys ortalyǵy nemese qala deńgeıinen de aýqymdy.

«Atap aıtqanda, iske asyrylyp jatqan sharýalardyń barlyǵyna túrtki bolǵan, soǵan serpin berip, múmkindik jasaǵan Tuńǵysh Prezıdent Nursultan Nazarbaevqa halyqtyń marapaty ári yqylasynan týyp, eskertkish qoısa, sondaı-aq Túrkistandy osyndaı deńgeıge jetkizgeni úshin eńbegin qalaı baǵalasa da jarasady dep oılaımyn», - dedi Darhan Myńbaı.

Onyń sózine qaraǵanda, Túrkistan búkil túrki jurtynyń rýhanı qatynastaryn, qara shańyraǵyn saqtap qalǵan.

«ıAǵnı, bul turǵyda rýhanı baılanystaryn, rýhanı tereń tamyrlaryn saqtap qalǵan osy jer. Muny barsha túrki álemi moıyndap otyr. Túrkistannyń tutas tarıhy tek birlikke qyzmet etken. Túrkistan bizdiń jańa dúnıetanymymyzdyń baspaldaǵy bolady. Qazir yqpaldasý dáýiri ekenin eskersek, túrki elderi osy protsesten tys qala almaıdy. Sondyqtan osy jer yqpaldasýdyń, bir múdde tanytýdyń, birlikke qadam basýdyń mańyzdy bastaýy bolady dep oılamyn. Túrkistannyń jańa dáýiri tarıhty da, búginimizdi de, bolashaǵymyzdy da sabaqtastyryp turady», - dedi Darhan Myńbaı.

Aıta keteıik, TÚRІKSOI-dyń Bas hatshysy Bılal Chakydjı «Túrkistan – Túrki áleminiń rýhanı astanasy: áriptestiktiń ıntegratsııasy men keleshegi» atty halyqaralyq onlaın-konferentsııada Túrkistanda Elbasyna eskertkish ornatý kerektigin aıtqan edi.