Túrkistannan shyqqan jaıaý ekspedıtsııa Mańǵystaýǵa jetti

AQTAÝ. QazAqparat- Shapshań júrýden sport sheberi, karateshi, Bekettanýshy, rýhanı izdenýshi, tarıhı ólketanýshy Sársenbaı Erqasymov «Qasıetti sapar» atty jaıaý ekspedıtsııasy aıasynda Túrkistannan Mańǵystaýǵa jaıaý keldi.

Sársenbaı Erqasymov Ábý Nasyr Ál-Farabıdiń týǵan jeri Túrkistan oblysynyń Sháýildir aýdanynan bastap, jalpy aýmaǵy 1 500 shaqyrym joldy artqa tastap, 362 Áýlıeli Mańǵystaý oblysynyń Beıneý aýdanyna taban tiredi.

Ol bul saıahatyn Beket Atanyń 270 jyldyǵy, Ál-Farabıdiń 1150 jyldyǵy, Abaıdyń 175 jyldyq mereıtoılary qurmetine arnaıdy. Ekspedıtsııanyń maqsaty qazaq jerindegi qasıetti jerlerdi aralap duǵa etý, el men jerdiń amandyǵy men bútindigi, jarqyn bolashaǵy úshin tilek tileý, Qazaq halqynyń rýhanı tanymdaryn sanada jańǵyrtý, kıeli oryndar men tarıhı tulǵalardy ulyqtaý, beıitterine zııarat etý, jas urpaqqa adam boıyndaǵy jan men tánniń múmkindigin kórsetý, elimizdegi rýhanı-mádenı týrıstik oryndarǵa serpin berý jáne nazar aýdartý.

Ekspedıtsııa 2 qazanda Sháýildir kentinen bastalǵan. «Qasıetti sapar» - «Elsana Amanat» qoǵamdyq qory men «Nurqasym ata» jeke qorynyń birikken jobasy.

«Qasıetti sapar» sharasy Qazaqstan astanasy men tórt oblystyń aýmaǵyn qamtıdy, ıaǵnı Nur-Sultan qalasy, Túrkistan, Qyzylorda, Aqtóbe, Mańǵystaý oblystary.

Sapardyń jol uzaqtyǵy shamamen - 1500 shaqyrym, merzimi - 1 aıdan astam ýaqyt.