Túrkistannan Nur-Sultanǵa aýyl sharýashylyǵy ónimderi tıelgen 40 kamaz jolǵa shyqty
17:41, 24 Tamyz 2022
TÚRKІSTAN. QazAqparat - Túrkistan oblysynyń sharýalary Nur-Sultanda ótetin jármeńkege 500 tonnadan astam ónim jiberdi, dep habarlaıdy QazAqparat tilshisi.
Tamyz aıynyń 27-28 kúnderi Nur-Sultan qalasynda Túrkistan oblysynyń taýar óndirýshileriniń qatysýymen aýyl sharýashylyǵy ónimderiniń jármeńkesi ótedi.
Jármeńkede quny 478 mln. teńgeni quraıtyn 500 tonnadan astam aýyl sharýashylyǵy ónimderi arzandatylǵan baǵamen satylady.
Atap aıtqanda, 113,5 tonna et jáne et ónimderi, 165,5 tonna kókónis, 23 tonna kartop, 72 tonna sút ónimderi, 69 tonna baqsha ónimderi, 34 tonna jemis-jıdek, 8 tonna bal, 31 tonna jemis shyryndary men konservilengen ónimder, 11 tonna balyq, 20 myń dana jumyrtqa jáne 2 tonna nan ónimderi satylymǵa shyǵarylady.