Túrkistannan 25 myń dollardy Ózbekstanǵa zańsyz alyp ótpek bolǵan jolaýshy toqtatyldy

NUR-SULTAN. QazAqparat – Túrkistan oblysyndaǵy «Qaplanbek» keden beketiniń qyzmetkerleri 25 myń dollardy shekaradan zańsyz alyp ótpek bolǵan Ózbekstan azamatyn toqtatty. Bul týraly QazAqparat Qarjy mınıstrliginiń baspasóz qyzmetine silteme jasap habarlaıdy.

«Kedendik tekserý barysynda Qazaqstan Respýblıkasynan Ózbekstan Respýblıkasyna ótý baǵytyndaǵy jolaýshylar termınalynda «Rapiscan» rentgentelevızıondyq qurylǵy arqyly qol júgin tekserý kezinde «A» esimdi 2003 jyly týǵan ózbekstandyq azamattan 25 000 AQSh dollaryna teń qolma-qol aqsha anyqtaldy. Ákimshilik is qozǵalyp, materıaldar Saryaǵash aýdandyq mamandandyrylǵan ákimshilik sotyna protsessýaldyq sheshim qabyldaý úshin jiberildi», - delingen resmı habarlamada.

Aıta ketsek, «Qazaqstan Respýblıkasynyń qarjylyq turaqtylyǵyn qamtamasyz etý jónindegi sharalar týraly» QR Prezıdentiniń 2022 jylǵy 14 naýryzdaǵy № 830 Jarlyǵymen Qazaqstan Respýblıkasynan:

- 10 000 (on myń) AQSh dollary balamasynan asatyn jáne áketý kúnine belgilengen Qazaqstan Respýblıkasy Ulttyq Bankiniń baǵamy boıynsha eseptelgen somadaǵy qolma-qol shetel valıýtasy jáne (nemese) shetel valıýtasyndaǵy aqsha quraldaryn;

- Qazaqstan Respýblıkasynyń Ulttyq Banki shyǵaratyn 5, 10, 20, 50 jáne 100 gramm affınırlengen altyn quımalaryn jáne «ALTYN BARYS» altynynan jáne «KÚMIS BARYS» kúmisinen jasalǵan ınvestıtsııalyq monetalardy, sondaı-aq 100 gramnan astam affınırlengen altyndy áketýge tyıym salynǵan.