Túrkistanǵa erekshe mártebe berý sharalaryn zerdeleıtin jumys toby quryldy

TÚRKІSTAN. QazAqparat – Túrkistan qalasyna erekshe mártebe berý baǵytynda zerdeleý jumystaryn júrgizý jónindegi jumys toby quryldy, dep habarlaıdy QazAqparat tilshisi.

Búgin Túrkistan qalasyna erekshe mártebe berý týraly zerdeleý jumystaryn júrgizý jónindegi jumys tobynyń alǵashqy jıyny ótip, birshama máseleler sarapqa salyndy.

«Túrkistanǵa erekshe mártebe berý bastamasy – tarıhı shahar úshin óte mańyzdy. Al ol qalaı júzege asýy kerek? Mán-maǵynasy, negizgi ıdeologııalyq jáne ekonomıkalyq baǵyttary qandaı bolady? Bul ábden ekshelip, arnaıy qujattar arqyly resimdelýi tıis», - dedi jumys tobynyń jetekshisi, oblys ákiminiń orynbasary Beısen Tájibaev.

Jıynda Túrkistan qalasyna erekshe mártebe berý baǵytyndaǵy hattamalyq tapsyrmalardyń oryndalý barysy talqylandy. Mádenıet jáne týrızm basqarmasy ókilderiniń usynystary tyńdaldy. Túrkistan qalasy ákimdigi tarapynan bastalǵan jumystar da baıandaldy. Jumys toby quramyna engen basqarma basshylary men ókilderi, sáýletshiler de pikirlerin aıtty. Qoja Ahmet ıAsaýı kesenesin qorǵaý, «Túrkistan qalasyna erekshe mártebe berý» boıynsha usynystar jınaqtaý jónindegi bastapqy qadamdar da saralandy.

«Bul baǵytta tarıhshylar, arheologter, rýhanııat salasynyń ókilderi, týrızm salasynyń bilgirleri, zańgerler, ıasaýıtanýshylar, sáýletshi-arhıtektorlar men jalpy Túrkistan janashyrlarynyń, ǵalymdar men zertteýshilerdiń pikiri óte mańyzdy. Sondyqtan, osy bastamaǵa qatysty óz oıyn aıtyp, úlesin qosamyn deıtin qaıratkerlerdiń usynystary jınaqtalyp, alynǵany jón», - dedi B. Tájibaev.

Aıta keteıik, ótken jyly Memleket basshysy Qasym-Jomart Toqaev Túrkistan oblysyna jasaǵan jumys saparynda Túrkistanǵa tarıhı jáne rýhanı elorda mártebesin berý máselesin kótergen bolatyn.