Túrkistandyqtardyń 5 mln teńgesin jymqyrǵan áıelge sot úkimi shyqty
Jábirlenýshilerdiń aıtýynsha, alaıaq áıel, WhatsApp jelisinde chat ashyp, ondaǵy qosylǵan adamdarǵa aqsha salǵan jaǵdaıda 1 apta ishinde 50 paıyzǵa kóbeıtip bere alatynyn aıtyp sendirgen. Al oǵan senim bildirgen birneshe turǵyn túrli kólemde aqsha salyp, sońynda aldanǵandaryn túsingen. Atalǵan jaıt sotqa deıingi tergep-tekserýdiń biryńǵaı tizilimine engizilip, QR QK-niń 190-baby «Alaıaqtyq» boıynsha tirkeldi.
«Habar alysymen saryaǵashtyq polıtseıler jedel áreket etip, turǵyndardy aldap, aqshasyn alǵan kúdiktini qolǵa túsirý baǵytynda qarqyndy izdestirý sharalaryn júrgizdi. Polıtseıler alaıaqtyq qylmysyn ashý maqsatynda jábirlenýshilerden naqty málimetter aldy. Kelip túsken aqparat kózderi arqyly turǵyndardy aldaǵan jumyssyz, orta jastaǵy kelinshek ekeni anyqtaldy. Kúdikti áıel buǵan deıin de alaıaqtyq jasap, bas bostandyǵynan shekteý jazasy taǵaıyndalyp, ótep júrgeni belgili boldy», - dep jazdy departamentten.
Ol ózine sengen turǵyndarmen tildesip, 10 jábirlenýshiden jalpy 5 mıllıon teńgege jýyq aqsha alyp, bas paıdasyna jaratyp jibergen. Polıtseıler osy qylmystyq isti sońyna jetkizý úshin, jan-jaqty tekserý jumystaryn júrgizdi. Naqty dálelderdi keltire otyryp, is-qujattaryn jınaqtady. Osylaısha jınaqtalǵan qujattar zańdy sheshim qabyldaý úshin sotqa joldandy. Búginde sot 25 jastaǵy kúdikti áıeldi kináli dep tanyp, 3 jyl 6 aı bas bostandyǵynan aıyrý jazasyn taǵaıyndady.