Túrkistandyqtar MÁMS aıasynda tegin em qabyldap jatyr
Aıbatyr Jumaǵulov aldymen aýdandyq ortalyq aýrýhanasyna baryp, onda MÁMS júıesi arqyly tegin em qabyldap jatqan naýqastarmen kezdesti. Jergilikti halyqqa jańa jobanyń artyqshylyqtaryn túsindirdi.
«2020 jyldyń 1 qańtarynan bastap mindetti áleýmettik medıtsınalyq saqtandyrý júıesi iske qosyldy. Qazirgi ýaqytta Túrkistan oblysy turǵyndarynyń 96,9% - MÁMS qatysýshylary. Onyń ishinde 1 mln 300 myń adam - 15 jeńildigi bar sanattaǵy azamattar, al olar úshin jarnany memleket aýdarady. Qor oblys boıynsha 73 medıtsınalyq mekememen kelisimshartqa otyrýdy josparlaǵan. Onyń ishinde 40-y - memlekettik, al 33-i - jeke klınıka. Kelisimge kelgen mekemelerde medıtsınalyq saqtandyrylǵan azamattar aqysyz em qabyldaı alady», – dedi A.Jumaǵulov.
Jalpy aýdandyq ortalyq aýrýhanaǵa 188 803 turǵyn tirkelgen. Búginde saqtandyrylǵan turǵyndar emhanada kompıýterlik tomografııa (KT) men magnıtti rezonansty tomografııadan (MRT) tegin óte alady. MÁMS aıasynda alǵashqy medıko-sanıtarlyq jáne balalar men eresekterge arnalǵan mamandandarylǵan medıtsınalyq kómek kórsetýmen aınalysatyn medıtsınalyq uıymdardyń múmkindigi keńeıe túsken. Jańa júıe aıasynda aýyl medıtsınasyna jiti nazar aýdarylyp jatyr. Aýyldyq jerlerde turatyn azamttar tek sol jerdegi aýdandyq aýrýhanamen ǵana shektelip qoımaı, eger qandaı da bir kúrdeli dárigerlik emdik sharalardy oblys nemese respýblıkalyq deńgeıde alýǵa múmkindigi bar.
Aıta keteıik, búginde aýdan kóleminde jańadan birneshe bastapqy medıtsınalyq sanıtarlyq kómek kórsetý ortalyqtary ashylǵan. Basqarma tóraǵasy solardyń qataryna kiretin «Kóktóbe» medıtsınalyq mekemesinde de boldy. Ortalyqta kardıolog, hırýrg, stomatolog beıindi mamandar 20239 naýqasqa qyzmet kórsetip keledi. Onda 15 dáriger, 76 orta medıtsına qyzmetkeri jumys isteıdi.
Aıta keterligi, buryn aýyl turǵyndary beıindi mamandardyń kómegin aýdandyq aýrýhanadan alatyn bolsa, qazirgi ýaqytta eshkedergisiz óz aýylynda ornalasqan emhana kómegine júginedi.