Túrkistandyqtar Qurban aıtty ulttyq naqyshta atap ótedi
Óńirdiń bas ımamnyń aıtýynsha, Qasıetti Qurban aıt bıyl 11-i tamyz kúnge sáıkes kelip otyr. Úsh kúnge jalǵasatyn merekeniń áleýmettik mańyzy zor. Aıt namazy oqylyp, qurbandyq shalý isi atqarylǵan soń, jamaǵat arasynda qol kúres, kir tasyn kóterý sekildi túrli sporttyq sharalar uıymdastyrylmaq. Tipti, meshitterdiń aldyna ornalastyrylǵan batýttarda balalardyń tegin kóńil kóteredi.
Sondaı-aq, Arys qalasyndaǵy ortalyq meshitte QMDB jáne «Zeket» qorynyń uıymdastyrýmen qurbandyq shalynyp, jergilikti turǵyndarǵa taratý josparlanyp otyr.
«QMDB-nyń pátýasymen birinshi aıt merekesin toılap, Túrkistan oblysy boıynsha saǵat 7:00-den 15 mınýt ótken ýaqytta Aıt namazyn oqıtyn bolamyz. Qurban aıt merekesi eldi birlikke, yntymaqqa, shaqyratyn, halyqtardy jaqyndastyratyn, ıgilik isterdi maqsat tutqan rýhanı mereke. Qurban arab tilinde «jaqyndaý» degendi bildiredi, ıaǵnı jasaǵan saýap ister arqyly júrekti tazartyp, Allaǵa jaqyndaı túsý. Qurban aıt - musylmannyń ulyq merekesi. Qurban aıtta qurbandyqqa mal shalý – Hanafı mázhabynda shamasy jetkenderge ǵana ýájip. Qurbandyq etin úshke bólip taratýǵa bolady. Bir bóligi ózine qalady, ekinshi bóligi aǵaıyn-týys, kórshilerge beriledi, úshinshi bóligi kómekke muqtaj kisilerge taratylady», – dedi Túrkistan oblysynyń bas ımamy M.Aqtamberdi.
Túrkistan qalasynyń bas ımamy Júsipbek Qasymbekovtyń aıtýynsha bıyl kıeli shaharda aıt namazy 25 meshitte oqylatynyn aıtyp ótti. Qaladaǵy úsh meshitte qurbandyq shalynyp, tizim boıynsha jaǵdaıy tómen otbasylarǵa taratylmaq. Qazir áleýmettik jaǵdaıy tómen otbasylardyń tizimi jasalyp jatyr.
Jıynda oblystyń bas ımamy respýblıka boıynsha 3200-den astam adam qajylyqqa attanǵandyǵyn jetkizdi. Olardyń basym bóligin Shymkent qalasy men Túrkistan oblysy aýmaǵynyń turǵyndary qurap otyr.