Túrkistandyq jýrnalıster asyq atyp, láńgi tebýden jarysty
28 maýsym - Buqaralyq aqparat quraldary qyzmetkerleri kúnine oraı jýrnalıster arasynda spartakıada ótti. Túrkistan oblystyq qoǵamdyq damý basqarmasy men Qazaqstan Jýrnalıster odaǵy Túrkistan oblystyq fılıaly birlese uıymdastyrǵan is-sharada BAQ ókilderi ártúrli saıysqa túsip, ózara myqtyny anyqtady.
Máselen, kir tasyn kóterip, qol kúrestirip kúshtilikterin kórsetti. Nysanany kózdeý arqyly eptilikterin tanytty. Al, komandalyq jarysta arqan tartyp, asyq oınady. Láńgi teýip, qappen júgirdi jáne bylǵary qolǵap kıip kámpıt arshydy. Qyzdar jaǵy jemis-jıdekten assortı ázirlep aspazdyq qyrlaryn kórsetti. Án aıtyp, bı bılep ónerlerin ortaǵa saldy.
Jıynda Túrkistan oblysy qoǵamdyq damý basqarmasynyń basshysy Ańsar Óserbaev BAQ ókilderin kásibı merekemen quttyqtady.
«Halyqpen bite qaınasyp, buqaraǵa shynaıy aqparat jetkizip júrgen BAQ ókilderiniń qoǵamdaǵy orny erekshe. Sport básekesi sátti ótsin. Shyn myqtylar jeńis tuǵyrynan kórine bersin» - dedi ol.
Al, Qazaqstan Jýrnalıster odaǵy Túrkistan oblystyq fılıalynyń tóraǵasy Ǵalymjan Elshibaı, «Túrkistan» telearnasynyń dırektory Janahmet Aǵybaev, professor Bekjigit Serdáli jáne ózge de BAQ basshylary men ardager jýrnalıster jarys jolyna túsken qalamgerlerge sáttilik tiledi.
Spartakıada qorytyndysynda úzdik dep tanylǵan komandalar men úzdik qatysýshylar arnaıy marapattarǵa ıe boldy. Al, is-shara sońynda kópshilik alaý jaǵyp, án aıtty.