Túrkistandyq júrgizýshilerden 3 kúnde 9,5 mln teńge aıyppul óndirildi

TÚRKІSTAN. QazAqparat - Túrkistan oblysy PD Ákimshilik polıtsııa basqarmasynyń uıymdastyrýymen «Boryshker» jedel-profılaktıkalyq is-sharasy ótýde, dep habarlaıdy QazAqparat.

Vedomstvonyń málimetinshe, sharanyń negizgi maqsaty - ákimshilik quqyq buzýshylyq týraly ister boıynsha qaýlylardy baqylaý, olardyń ýaqtyly oryndaýyn jandandyrý. Óńirde boryshkerler men jol erejesin qasaqana buzýshylardy anyqtaý boıynsha polıtsııa jáne sot oryndaýshylarynan 60-tan astam mobıldik top jumyldyrylǵan.

«Tártip saqshylary «Avtoýragan» jyljymaly kesheni men «Qorǵaý» júıesi arqyly 350 myń teńgege jýyq tólenbegen ákimshilik aıyppuly bar júrgizýshiniń «Ravon» markaly avtokóligin anyqtady. Polıtsııa boryshkerdiń kóligin aıypturaqqa ornalastyrdy.

Jalpy «Boryshker» sharasy kezinde polıtseıler 2500-den astam ákimshilik hattama toltyrdy. Boryshker júrgizýshilerdiń 112 avtokóligi aıypturaqqa qoıyldy. Bıýdjetke 9,5 mıllıon teńgege jýyq aıyppul óndirildi. Boryshkerlerdiń jumys orny boıynsha 113 uıǵarym, al sot oryndaýshylaryna 936 qaýly jiberildi», - dep jazdy departamentten.

Óz kezeginde Túrkistan oblysynyń polıtseıleri júrgizýshilerdi jol qozǵalysy erejelerin buzbaýǵa jáne salynǵan ákimshilik aıyppuldardy ýaqtyly tóleýge shaqyrady.