Túrkistandyq jedel járdem dıspetcheri telefon arqyly júkti kelinshekti bosandyryp aldy
Oqıǵa 11 shilde kúni Arys qalasy Aqdala aýylynda bolǵan. Aı-kúni jetip tolǵaq qysqan aýyl turǵyny Ferýza Erkinova saǵat túngi 4.00 shamasynda jedel járdemge qońyraý soqqan. Tutqany kótergen dıspetcher Shoıra Shakırova arnaıy brıgadany baǵyttaıdy. Degenmen, aýyl men qala arasy alys bolǵandyqtan, kóliktiń jetýine birshama ýaqyt qajet bolǵan. Al, júkti kelinshektiń joldasy tolǵaqtyń kúsheıip jatqanyn aıtyp qaıta telefon soǵady. Shoıra jaǵdaıdy birden túsingendikten, telefon arqyly keńes bere bastaıdy. Sonymen, otbasynda úshinshi qyzdy ákesi men enesi jáne Túrkistanda otyrǵan dıspetcher bosandyryp alady. Kindigin qaıshymen kesip, úlken jaıalyqqa orap qoıady. Osy sátte jedel járdemde jetedi...
«Erteńine qaraı basshylyqtan habarlasyp, meni shaqyrtty. «Ne búldirgensiń» degende túsinbeı qaldym. Al, keıinnen qolyma Ferýzanyń jazǵan Alǵys hatyn tabys etip, ájesine habarlasýymdy surady. Ájesimen sóıleskende rahmetin aıtyp, jańa týǵan qyzdyń esimin Ámına dep qoıǵanyn jetkizdi. Qýanyp qaldym» - deıdi Shoıra Atajanqyzy.
Búginde Ámınanyń dúnıege kelgenine 2 aı boldy. Sábıdiń jaǵdaıy qalypty. Ata-anasynyń kóz aldynda ósip keledi.
«Áýeli Alla, sodan soń sebepshi bolǵan Shoıraǵa otbasymyzdyń atynan alǵysymyzdy aıtamyz» - deıdi Ferýza Erkinova.
Shoıra Shakırova qazirde Túrkistan oblystyq jedel járdem berý stantsııasynyń operatıvti bólim dıspetcheri qyzmet atqaryp jatyr. Jedel jelide kúndelikti turǵyndardan qońyraý qabyldap, jedel járdem brıgadasyn baǵyttap otyrady. Tipti, keı sátteri telefon arqyly alǵashqy kómek kórsetip, keńes beredi.
«Biz kúndelikti tájirıbe almasyp, bilimimizdi shyńdap turamyz. Operatıvti bólim meńgerýshisi Tahır Abdıev ár kezekshilik saıyn atqarǵan jumystyń esebin qabyldap, baǵyt baǵdar berip otyrady. Men ol kisden kóp nárseni úırendim. Bizge tájirıbesimen úlgi bola bilgen Tahır Batyrbekulyna alǵysymdy bildiremin. Sondaı-aq, árdaıym kýrstarǵa qatysyp bilimimizdi jetildirip turamyz. Mol múmkindik berip, úlken jaǵdaı jasap otyrǵan Túrkistan oblystyq jedel medıtsınalyq járdem stantsııasynyń bas dárigeri Qanat Týmanovqa rahmetimdi aıtamyn» - deıdi ol.
Shoıra Atajanqyzy jedel járdemde qyzmet etýdi bala kezinen armandaǵan. Mektep oqyp júrgende dáriger bolý úshin kóp daıyndalypty. Keıinnen Túrkistan kópsalaly medıtsına kolledjinde «feldsher» mamandyǵyn meńgerdi. Eńbek jolyn meıirbıke bolyp bastady. Endi bala kúngi armany feldsherlik salaǵa aýysyp, halyqqa qyzmet kórsetip, kómek berýdi jopsarlap otyr.
«Men feldsher bolyp, jedel járdemde qyzmet atqarýdy bala kezimnen armandaǵanmyn. Adamdarǵa kómekteskim kelip turady. Ósirip otyrǵan ul-qyzymdy da bolashaqta dáriger mamandyǵyn meńgertsem deımin»- deıdi ol.