Túrkistandyq jastar onlaın rejımde tegin til úırenýde

NUR-SULTAN. QazAqparat - Elimizde tótenshe jaǵdaıdyń jarııalanýyna baılanysty Túrkistan oblystyq «Jastar resýrstyq ortalyǵy» kópshiliktiń bas qosýymen ótetin is-sharalardy keıinge shegerdi, dep habarlaıdy oblystyq ákimdiktiń baspasóz qyzmeti.

Kórsetiletin qyzmetterdi qashyqtan júzege asyrý boıynsha jumys josparyn qabyldap, qarqyndy atqarýda. Jastardyń úzdiksiz damýyn ári bos ýaqytyn tıimdi paıdalanyp, qashyqtan oqýǵa daǵdy qalyptastyrý maqsatynda jáne kez kelgen jaǵdaıdyń múmkindigi mol ekenin úıretetin úzdik jobalardy jastar nazaryna usyndy.

Atap aıtar bolsaq, áleýmettik jeli arqyly onlaın jospar boıynsha «Jastar online», «Naýryz, naýryz kún ıgi» atty kórkemsóz oqý vıdeo-baıqaýy jáne jańa formatta qashyqtan oqytatyn «Qoljetimdi aǵylshyn» jobasy iske qosyldy. Qazirgi tańda aǵylshyn tilin tegin ári tereń meńgerý úshin 200-ge jýyq jas tirkelgen.

Mamandardyń aıtýynsha, tirkeý jumystary áli de jalǵasýda. Qoǵamdyq damý basqarmasyna qarasty «Jastar resýrstyq ortalyǵy» qolǵa alǵan jobanyń aıasynda jastar aǵylshyn tilin qashyqtyqtan tegin úırenetin bolady.

Sondaı-aq, elektrondy oqýlyq platformasy arqyly «UBT-ǵa daıyndyq boıynsha sheberlik kýrsy» bastaldy. Kýrsqa tegin qatysyp, úzdik ustazdardan dáris alýǵa bolady. Nıet bildirgen ustazdar úshin de onlaın rejımde sabaq berýge múmkindikter qarastyrylýda. Aldaǵy ýaqytta «Túrkistan oblysy jastary oqýy qajet 100 kitap» elektrondy oqýlyq bazasy, A. Qunanbaevtyń 175 jyldyǵyna arnalǵan óleń, qara sózderdiń maǵynasyn erekshe jáne aýqymdy taldaý boıynsha «Abaı oqýlary» jáne «Túrkistanym – maqtanyshym!» atty jazba, jas aqyndardyń oblystyq onlaın-baıqaýy jáne basqa da utymdy jobalar usynbaq.

Budan basqa, COVID-19 vırýsyna baılanysty turǵyndardyń saýaldaryna shuǵyl jaýap berý úshin «Jastar resýrstyq ortalyǵynyń» qyzmetkerleri Call-ortalyǵyna jumyldyrylǵan.