Túrkistandyq jastar kópbalaly otbasyǵa baspana salyp berdi
Túrkistandyqtar taǵy bir muqtaj otbasyǵa baspana syılap, qasıetti Ramazan aıynda saýapqa keneldi. Atap aıtqanda, «Bekzat» turǵyn alabynda 1991 jyly týǵan jastar judyryqtaı jumylyp, bir otbasynyń qýanyshyna sebepshi boldy. Bul - óńir turǵyndarynyń birneshe jyldan beri dástúrli túrde jolǵa qoıǵan úrdisimen syıǵa berilgen 6-baspana.
«Ómirzaqovtar januıasynda úlken qýanysh. Qurdastarymyzben ıgilikti is atqaryp, birneshe jyldan beri páter jaldap kúneltip kelgen jandarǵa qoldaý kórsettik. 4 bólmeli úıdi óz kúshimizben salyp, barlyq qajetti turmystyq tehnıkamen qamtydyq. Otaǵasy Nurǵalı jary Jansaıamen birge 4 perzentti tárbıelep otyr. Árıne, kópshilikpen biter sharýaǵa uıymshyldyqpen úles qosqan barlyq azamattarǵa alǵys bildiremiz», - dedi uıymdastyrýshylardyń biri Aqbolat Anashbekov.
Buǵan deıin Bekzat Sattarhanov atyndaǵy móltek aýdannyń 1982 jáne 1983 jyldary týǵan azamattary mektep bitirgenderine 20 jyl tolýyna oraı 2 muqtaj shańyraqqa baspana syılaǵan bolatyn. Sonymen qatar, 1988, 1989 jáne 1990 jyly týǵan jastar da áz-Naýryz merekesi qarsańynda 3 otbasynyń óz shańyraǵy bolýyna muryndyq bolǵan. 1992 jyly týǵan jigitter de qaıyrymdylyq estafetasyn kelesi jyly jalǵastyrýǵa nıetti.