Túrkistandyq jastar 1000 teńgeden aqsha jınap, aýyl kóshesin jaryqtandyrdy
Sozaq aýylyndaǵy «Shaqyryq» móltek aýdanynyń jastary ıgi iske uıytqy boldy. Olar uzyndyǵy bir shaqyrymnan asatyn Q.Toqmaǵanbetov atyndaǵy kóshege jańadan 36 baǵana ornatyp, jaryq shamdaryn jalǵady.
Jastar temir baǵanalar men jaryq shamdardy qaladan satyp alyp kelgen. Dánekerleý jumystaryn da ózderi jasaǵan. Al jaryqty aýyldaǵy elektrık azamattar tartyp bergen.
«Qazir kóshemiz túnde jap-jaryq. Ortaq isten eshkim qalys qalǵan joq. Qarajat jınaýda da jastar óz erkimen belsendilik tanytty» - deıdi Qaırat Bolatbekov.
Jalpy sozaqtyq jastar jeke qor ashqan. Onda aı saıyn 1000 teńgeden jınalyp otyrady. Qorǵa túsken qarajat ortadan qurylǵan komıssııa músheleriniń sheshimimen aýyldaǵy ózekti máselelerdi sheshýge baǵyttalady.
Endigi maqsattary – aýylda jastar saıabaǵyn salý. Qazirgi kezde bul baǵytqa aýyl ákimdiginen jer surap otyr. Másele sheshilgen boıda qurylys jumystaryna birden kirispek.
Aıta keteıik, Sozaq aýylynyń turǵyndary qashan da belsendi. Máselen mektep bitirgenine 10 jyl tolatyn túlekter jyl saıyn aýyldaǵy az qamtylǵan eki otbasyna úı salyp beredi.