Túrkistandyq toǵyz balaly omartashy baldyń 10 túrin óndiredi

TÚRKІSTAN. QazAqparat – Túrkistan oblysynyń Keles aýdanynda turatyn omartashy Málik Aıtymbetov 70 jáshik bal arasyn ustaıdy. Aýyl turǵynynyń bul ispen aınalysqanyna 7 jyl bolǵan, dep habarlaıdy QazAqparat tilshisi.

Abaı aýylynyń turǵyny - 9 ul-qyzdyń ákesi. 45 jastaǵy toǵyz balanyń ákesi ataýly áleýmettik kómek almaı turyp, isin órge domalata almaǵan. ıAǵnı, omartashylyqqa qajetti qural-saımandardy túgeldeýge shamasy jetpegenin aıtady. Al, byltyr áleýmettik kómek alǵan otbasy tirligin dóńgeletip áketken. Úkimetten 9 balaǵa 1 mln 498 myń teńge qarjy berilgen. Osy qarjyǵa ol bal óndiretin dıirmen jáne omarta jáshikterin, kóshirýge tirkeme satyp alǵan.

«Biz aýyldaǵy kópbalaly otbasy sanalamyz. Januıamyzda 11 janbyz. Allanyń bergen 9 ul-qyzy bar. Solardyń nesibesine ótken jyly úkimetten ataýly áleýmettik kómek taǵaıyndaldy. Qujatty der kezinde daıyndap, jergilikti ákimdikke ótkizdik. Kóp uzamaı úlken qarjyǵa qol jetkizip, ózimniń sharýashylyǵyma qajetti bar kerek-jaraqty satyp aldym. Búginde sonyń arqasynda baldyń 10 túrin óndirip jatyrmyn», – deıdi Málik Aıtymbetov.

Búginde omartashynyń áıeli Naǵıma Aıtymbetova bala kútiminen bosap, bir mekemege tazalaýshy bop jumysqa ornalasqan. Aılyq jalaqysy – 40 myń teńge. Omartashylyqty kásip etken otbasynyń úlkeni Nur-Sultan qalasyndaǵy joǵary oqý ornynda oqıdy.

Olardyń endigi armany – omartashylyqty keńeıtip, bal arasy ornalasqan tirkemelerdi tasıtyn júk kóligin satyp alý.