Túrkistandyq soǵys ardageri tańsáriden daýys berýge keldi

SOZAQ. QazAqparat – Túrkistan oblysynyń Sozaq aýdanynda maıdanger alǵashqylardyń biri bolyp daýys berdi, dep habarlaıdy QazAqparat óńir ákiminiń baspasóz qyzmetine silteme jasap.

Túrkistan oblysynyń Sozaq aýdanynda Ekinshi dúnıe júzilik soǵys ardageri Myrzahmet Jylysbaev alǵashqylardyń biri bolyp Syzǵan aýyl okrýgindegi №701 saılaý ýchaskesine kelip, óz tańdaýyn jasady.

Sanaly ǵumyryn aýdannyń damýyna arnap, elge qyzmet etken maıdanger búgingi mańyzdy saıası naýqan joǵary deńgeıde ári ádil ótýin tilep, bata berdi.

«El bolashaǵy úshin árbir azamattyń daýysy mańyzdy. Sondyqtan men de jasym 90-nan asqanyma qaramastan, tańsáriden kelip óz tańdaýymdy jasap, saıası naýqannan shet qalmadym. Qashanda elimiz aman, beıbitshilik zaman bolsyn»,– dep izgi aq tilegin jetkizdi.

Sondaı-aq qarııa saılaý komıssııasynyń jumysyna tabys tiledi.

Aıta keteıik, búgin elimizde Parlament Májilisiniń jáne jergilikti máslıhattar depýtattaryn kezekten tys saılaý ótip jatyr.