Túrkistandyq sharýalar mereke qarsańynda gúlderin saýdaǵa shyǵaryp jatyr

TÚRKІSTAN. QazAqparat – Túrkistan oblysynda gúl sharýashylyǵymen aınalysatyn turǵyndar qyzǵaldaq, raýshan, lala gúlderin arnaıy naýryz merekesine saýdaǵa shyǵardy. Qazir elimizdiń birneshe qalasynan tapsyrys qabyldaýda, dep habarlaıdy QazAqparat tilshisi.

Saryaǵash aýdanynda jylyjaı isimen aınalysatyn sharýalar jyldyń tórt mezgilinde elimizdiń túkpir-túkpirine gúl satyp keledi. Sondyqtan shekaraly aýdandy «jylyjaılar mekeni» dep atap ketken. Jeri qunarly, klımaty qolaıly bolýyn paıdalanǵan sharýalar gúldiń birneshe túrin ósirip jatyr. Ósimdikterdi tek Shymkent qalasyna ǵana emes, Almaty, Astana syndy iri qalalarǵa jetkizip beredi. Al, mereke qarsańynda gúlderdi satyp alýshylardyń qarasy qalyń. Suranys kún sanap artyp keledi. Máselen, Derbisek aýyldyq okrýgi aýmaǵynda ornalasqan «Kóktem» sharýa qojalyǵy 8 jyldan beri qyzǵaldaq gúlin ósirýmen aınalysady. Jylyjaı kólemi 1,30 gektar aýmaqty alyp jatyr. Atalǵan sharýa qojalyǵynda qyzǵaldaq gúlderiniń gollandııalyq 10-nan astam túri ósiriledi. Munda 10 adam turaqty jumyspen qamtylǵan. Tájirıbeli kásipker jylyna 120 - 130 myń túp qyzǵaldaq gúlin ósiretinin aıtady. Atalǵan aýyldyq okrýgtegi «Alııa» sharýa qojalyǵy raýshan, qara sıqyr jáne gollandııalyq frıdým túrlerin ósiredi. Jylyjaıdyń kólemi 4 gektar sharshy metr aýmaqta ornalasqan. Bul kásipti 15 jyldan beri júrgizip kele jatqan sharýa jylyna 20 - 40 myń túp raýshan gúlin saýdaǵa shyǵarady.