Túrkistandyq sharýa kúmándi dáriden soń 300-den astam qoıynan aıyryldy

ASTANA.QazAqparat - Aldymen janýarlarda dıareıa bastalǵan. Veterınarlyq dárihana satýshysynyń keńesimen satyp alynǵan dáriden keıin qoılar jappaı qyrylyp qalǵan, dep habarlaıdy QazAqparat Otyrar.kz-ke silteme jasap.

«Farmatsevt untaqtyń arzanǵa túsetinin, dárilik preparatty 10 lıtr sýǵa eritip, 5-10 gramnan berý kerektigin aıtty. Men bárin sol aıtqandaı istedim. Bári jaqsy bolady dep oıladym. Biraq keshki onnan keıin sumdyq boldy, 320 bas qoı qyrylyp qaldy», - dedi Samat Qadyrov.

Sharýa oqıǵadan keıin polıtsııaǵa da, mal dárigerlerine de habarlasqan.

«Barlyǵy bul shoshqa men taýyqqa arnalǵan dári deıdi, qoılar eki eselengen dozadan qyrylǵan. Ólekseler saraptamaǵa alynatynyn aıtty. Biraq, bizde áli kúnge deıin janýarlardyń dál osy preparattan qyrylǵany týraly eshqandaı dálel men saraptama joq»,-deıdi sharýa.

Veterınarlyq dárihana bul oqıǵaǵa qatysty túsinikteme bermedi.

Zerthana mamandary aldymen janýarlardy veterınarǵa kórsetip, sodan keıin ǵana maman nusqaýymen dári-dármek satyp alynýy kerek deıdi.

«Mal ıesi bul dári-dármekti óz qarajaty esebinen táýelsiz zerthana zertteýine jibere alady. Biz óz tarapymyzdan saraptamaǵa jiberdik. Nátıje 9 kúnnen keıin bolady»,- dedi Túrkistan oblysy veterınarııa qyzmeti basshysynyń orynbasary Álmet Orazbekov.