Túrkistandyq shabandozdar kókpardan el chempıony atandy

TÚRKІSTAN. QazAqparat - Kókpardan jastar arasynda apta boıy jalǵasqan Qazaqstan chempıonatynda Túrkistan oblysynyń «Qulager» komandasy bas júldege ıe boldy, dep habarlaıdy QazAqparat.

Sonymen qatar, ulttyq sport túrleri aýdaryspaq, jamby atý jəne teńge ilýden ótken elishilik jarystardyń jeńimpazdary men júldegerleri de anyqtaldy.

Kileń myqty jigitter baq synasqan kókpar dodasyna elimizden 9 komanda qatysty. Bıyl 15-ret jalaýy jelbiregen shabandozdar saıysynyń aqtyq synynda Túrkistan oblysynyń komandasy Jambyl oblysynan kelgen «Áýlıeata» kókparshylaryn 6:2 eseppen oısyrata jeńdi.

Jambyl oblysynyń kókparshylary - kúmis júldeger, Almaty qalasynyń quramasy - qola júldeger atandy.

Sonymen qatar, ulttyq sport túrlerin jańǵyrtý maqsatynda aýdaryspaq, teńge ilý jəne jamby atýdan da bıylǵy Qazaqstan chempıonatynyń jeńimpazdary anyqtaldy.

Apta boıyna jalǵasqan jarysta bilekti de qaısar jigitter arasynda aýdaryspaqtan 4 salmaqta túrkistandyqtar jeńimpaz atandy.

Máselen, 70 kelide jeńistiń tuǵyrynan túrkistandyq Daryn Ótkelbaı kórinse, 80 kelide Rasýl Quraıysh, +80 keli salmaqta Ǵabıt Aǵabektiń baǵy jandy. Teńge ilýden Ǵalymjan Izjanovtyń mereıi ústem boldy.

Al, jamby atý jarysynda Jambyl oblysynyń sańlaǵy Baqdəýlet Babajan jeńimpaz atandy. Túrkistandyqtar Batyr Beksaýyt - kúmis alqa, Eralhan Aıkóz - qola júldeni qanaǵat etti.
Jarys sońynda jeńimpazdar men júldegerler arnaıy dıplommen marapattaldy.

Sondaı-aq, aýdaryspaqtan «Úzdik sportshy» atanǵan Rasýl Quraıysh pen kókpardan «Úzdik salymshy» nomınatsııasyna ıe bolǵan Sabyr Baqdaýletke gramotalar tabys etildi.

Al, jankúıerlerdi óziniń talantymen tań qaldyrǵan Namyskók atty sáıgúlik «Úzdik at» atandy.