Túrkistandyq saılaýshy: onlaın daýys berý durys sheshim bolǵan

TÚRKІSTAN. QazAqparat - Túrkistan oblysynda praımerız sharasynyń daýys berý kezeńi joǵary deńgeıde ótip jatyr. Partııa músheleriniń biri Narıman Marhabaev daýys berýde onlaın júıeniń qoldanylýy durys sheshim bolǵanyn aıtady, dep habarlaıdy QazAqparat tilshisi.

Narıman Marhabaev eń jas saılaýshylardyń biri sanalady. Jasy 19-ǵa tolǵan jigit Keles aýdanyndaǵy «Jastar resýrstyq ortalyǵynda» ınspektor bolyp qyzmet atqarady.

«Praımerızdiń onlaın formatta ótkizilýi durys sheshim boldy. Birinshiden, pandemııa kezinde turǵyndardyń qaýipsizdigi saqtaldy. Ekinshiden, saılaýshylardyń ýaqyty únemdeldi. «Praımerız» aqparattyq júıesi jaqsy jasalǵan. Barlyq kandıdat týraly derek bar. Men aýdannyń, oblystyq damýyna úles qosady-aý dep senim artqan birneshe úmitkerge daýysymdy berdim. Úzdikterdi osylaı ashyq tańdaǵan jón», – deıdi ol.

Aıta keteıik, óńirden 1-3 qazan aralyǵynda ótetin daýys berýge 78262 partııa múshesi qatysady dep josparlanǵan bolatyn. Búginde olardyń 245 bastaýysh partııa uıymdaryna bekitilgen.