Túrkistandyq polıtseılerge zamanaýı qurylǵylarmen jabdyqtalǵan 250-den astam kólik berildi

TÚRKІSTAN. QazAqparat - Qazaqstan polıtsııasynyń 30 jyldyǵyna oraı Túrkistan oblysy Polıtsııa departamenti jańa kóliktermen tolyqty, dep habarlaıdy QazAqparat tilshisi.

Saltanatty sharaǵa Túrkistan oblysynyń ákimi Darhan Satybaldy men Túrkistan oblystyq Polıtsııa departamentiniń bastyǵy polıtsııa general-maıory Murat Qabdenov pen jeke quram qyzmetkerleri qatysty.

Oblys ákimi tártip saqshylaryn quttyqtap, jańa kólikterdiń kiltin tabys etti.

«Memleket basshysy Qasym-Jomart Toqaev quqyq qorǵaý organdarynyń áleýmettik jáne materıaldyq-tehnıkalyq bazasyn nyǵaıtýdy tapsyrǵan bolatyn. Bul baǵyta Túrkistan oblysynda naqty jumys bar. Qazirgi tańda Túrkistan qalasynda Polıtsııa departamentine arnalǵan jańa ǵımarattyń qurylysy aıaqtalýǵa jaqyn. Elde tynyshtyqty saqtaýda, Túrkistandy túletýde sizderdiń de qosar úlesterińiz mol», – dedi Darhan Satybaldy.

Jyl basynan beri Túrkistan óńiriniń polıtsııa qyzmetkerlerine 252 jańa qyzmettik kóliktiń kilti tabystaldy. Sonyń birqatary búgingi saltanatty jıynda tártip saqshylaryna usynyldy. Atap aıtsaq, QR ІІM men jergilikti ákimdiktiń qoldaýymen óńirdiń patrýldik polıtsııa qyzmetkerleri – 94 birlik, ýchaskelik polıtsııa ınspektorlary – 64 birlik, ýaqytsha ustaý ızolıatory – 12 birlik, aýdandardyń tergeý bólimi – 17 birlik, kezekshi bólimder – 20 birlik qyzmettik avtokóliktermen qamtamasyz etildi. Sondaı-aq qala, aýdandarǵa avtobýstar men avtozaktar úlestirildi.

Tártip saqshylaryna berilgen temir tulparlar tutastaı zamanaýı quraldarmen jabdyqtalǵan. Dybys kúsheıtkish qondyrǵysy men ratsııasy bar. JPS júıesi arqyly kólikterdiń qaı baǵytta júrgeni ortalyqtan baqylanady.